फैजपूर – (प्रतिनिधी) – येथील धनाजी नाना महाविद्यालयातील ग्रंथालयात 15 ऑक्टोबर रोजी भारताचे माजी राष्ट्रपती डॉ. एपीजे अब्दुल कलाम यांच्या जयंतीनिमित्त ‘वाचन प्रेरणा दिन’ साजरा करण्यात आला. याप्रसंगी प्राचार्य डॉ. आर. बी. वाघुळदे यांच्या हस्ते डॉ. एपीजे अब्दुल कलाम यांच्या प्रतिमेस माल्यार्पण करून आदरांजली अर्पण करण्यात आली.
कार्यक्रमाचे प्रमुख वक्ते प्राध्यापक डॉ. शरद बिऱ्हाडे यांनी विद्यार्थ्यांसोबत संवाद साधला आणि त्यांना डॉ. कलाम यांच्या जीवनातील कार्य तत्परता व देशसेवा जाणून घेण्याचे आवाहन केले. “विद्यार्थ्यांनी कलाम यांचे अनेक ग्रंथ वाचून त्यांचे विचार आत्मसात करावेत,” असे त्यांनी सांगितले.
कार्यक्रमाच्या अध्यक्षीय भाषणात प्राचार्य डॉ. आर. बी. वाघुळदे यांनी विद्यार्थ्यांना “विद्यार्थी दशेत ग्रंथाला आपले मित्र बनवावे” असा सल्ला दिला. त्यांनी विद्यार्थ्यांना केवळ अभ्यासक्रमापुरते न थांबता, ग्रंथालयातील प्रेरक पुस्तकांचे वाचन करून जीवन समृद्ध करण्याचे आवाहान केले.
कार्यक्रमाचे प्रास्ताविक व आभारप्रदर्शन ग्रंथपाल आय. जी. गायकवाड यांनी केले. या प्रसंगी उपप्राचार्य डॉ. एस. व्ही. जाधव, उपप्राचार्या डॉ. कल्पना पाटील, प्राध्यापक डॉ. जगदीश खरात, प्राध्यापक विजय तायडे, प्राध्यापक योगेश तायडे यांच्यासह विद्यार्थी आणि विद्यार्थिनी मोठ्या संख्येने उपस्थित होते.
डॉ. एपीजे अब्दुल कलाम यांच्या ग्रंथांचे विशेष प्रदर्शन या वेळी भरविण्यात आले होते. कार्यक्रमाच्या यशस्वीतेसाठी श्री. उमाकांत पाटील, सौ. यामिनी पाटील, सौ. सुरेखा सोनवणे आणि श्री. भूषण पाटील यांचे सहकार्य लाभले.
