जळगाव-(जिमाका)- जिल्ह्यातील परिक्षा केंद्रावर नीट (यूजी) परीक्षा दिनांक 21 जून 2026 रोजी होणार असून परीक्षेदरम्यान कोणतेही गैरप्रकार होऊ नयेत यासाठी प्रशासनाने उपाययोजना लागू केल्या आहेत. जिल्ह्यातील सर्व परीक्षा केंद्रांवर “कॉपीमुक्त अभियान” राबविण्यात येणार आहे.
जिल्ह्यात नीट (यूजी) परीक्षेसाठी एकूण 12 परीक्षा केंद्रे निश्चित करण्यात आली आहेत. परीक्षा काळात केंद्रांवर गैरप्रकार होऊ नये तसेच शांतता व सुव्यवस्थेला बाधा निर्माण होण्याची शक्यता लक्षात घेऊन अपर जिल्हादंडाधिकारी वैशाली चव्हाण यांनी भारतीय नागरी सुरक्षा संहिता 2023 च्या कलम 163 अन्वये आदेश जारी केला आहे.
या आदेशानुसार, 21 जून रोजी परिक्षा केंद्रावर पेपर सुरू झाल्यापासून ते पेपर संपेपर्यंतच्या कालावधीत सर्व परीक्षा केंद्रांच्या 100 मीटर परिसरात कोणालाही प्रवेश करण्यास मनाई करण्यात आली आहे. मात्र, सदर आदेशान्वये परीक्षार्थी, नियुक्त अधिकारी-कर्मचारी, पोलीस व होमगार्ड यांना या निर्बंधातून सूट देण्यात आली आहे.
तसेच, सर्व परीक्षा केंद्रांच्या 500 मीटरच्या परिसरातील झेरॉक्स दुकानेही वरील कालावधीत बंद ठेवण्याचे निर्देश देण्यात आले आहेत. आदेश तातडीच्या परिस्थितीमुळे एकतर्फी जारी करण्यात आला असून त्याचे काटेकोर पालन करण्याचे आवाहन प्रशासनाने प्रसिद्धी पत्रकाद्वारे केले आहे.
