मुंबई – (प्रतिनिधी) – अवघ्या महाराष्ट्राला अनेक वर्षांपासून खळखळून हसवणारा व प्रेक्षकांचे भरपूर मनोरंजन करणारा ‘महाराष्ट्राची हास्यजत्रा’ हा हास्य कार्यक्रम पुन्हा एका नव्या रुपात, नव्या ढंगात प्रेक्षकांच्या भेटीस येणार आहे.
खट्याळ विनोदवीरांचे विनोद व मिश्कील अभिनयाने ओतप्रोत असा हा मनोरंजक कार्यक्रम गेल्या काही दिवसांपासून बंद असल्याने अनेक प्रेक्षकांचा हिरमोड झाला. आपला आवडता कार्यक्रम लवकरच निरोप घेणार असल्याने या कार्यक्रमाचा प्रेक्षकवर्ग निराश झाला होता. पण त्यानंतर सोनी मराठी वाहिनीचे कंटेंट हेड अमित फाळके यांनी ‘न्यू सीझन सून…’ असे म्हणत याबाबतची एक पोस्ट सोशल मीडियावर शेअर केली होती. आता या कार्यक्रमाचा प्रोमो सोशल मीडियाद्वारे प्रदर्शित करण्यात आला असून या नवीन प्रोमोमध्ये ‘महाराष्ट्राची हास्यजत्रा’ मधील काही कलाकार दिसत आहेत.
सोनी मराठी वाहिनीने त्यांच्या अधिकृत इन्स्टाग्राम अकाऊंटद्वारे प्रोमो शेअर केलेल्या ह्या प्रोमोमध्ये प्रसाद खांडेकर, वनिता खरात, नम्रता संभेराव, शिवाली परब, दत्तू मोरे यांसारखे विनोदवीर ‘आम्ही सगळे येतोय रिटर्न, घेऊन कॉमेडीचा अस्सल पॅटर्न! ‘महाराष्ट्राची हास्यजत्रा’- चार वार हास्याचा चौकार!’ असे म्हणताना दिसत आहे.
येत्या १५ ऑगस्टपासून पुन्हा एकदा ह्या कार्यक्रमाची सुरुवात होत असल्याने प्रेक्षकांना आठवड्यातून चार दिवस सोमवार ते गुरुवार रात्री ९ वाजता या कार्यक्रमाचा आस्वाद घेता येणार आहे.
