मुख्य निवडणूक अधिकारी कार्यालयामार्फत संमेलनात होणार लेखक, भाषा आणि लोकशाही विषयावर परिसंवाद

नाशिक(जिमाका वृत्तसेवा)- भारत निवडणूक आयोगाच्या अधिनस्थ कार्यरत असलेल्या जिल्ह्यातील मुख्य निवडणूक अधिकारी कार्यालयातर्फे 94 व्या अखिल भारतीय मराठी साहित्य संमेलनात प्रथमच ‘लेखक, भाषा आणि लोकशाही’ या विषयावरील परिसंवादाचे आयोजन करण्यात आले आहे. त्या अनुषंगाने नागरीकांनी पॉलिटेक्निक बिल्डींग येथील उपमंडप या ठिकाणी ४ डिसेंबर २०२१ रोजी सायंकाळी ५.३० ते ७.३० या वेळेत या परिसंवादात उपस्थित राहून आपला सहभाग नोंदवावा, असे आवाहन उपजिल्हाधिकारी तथा उप जिल्हा निवडणूक अधिकारी स्वाती थविल यांनी शासकीय प्रसिद्धी पत्रकान्वये केले आहे.

जिल्ह्यातील मुख्य निवडणूक अधिकारी कार्यालयातर्फे होणारा परिसंवाद Chief Electoral Officer Maharashtra या फेसबुक पानावरून आणि https://ceo.maharashtra.gov.in/ या संकेतस्थळावरूनही ऑनलाईन स्वरूपात पाहता येणार आहे.

या संमेलनाच्या माध्यमातून मतदाराच्या जनजागृतीसंबंधी प्रकाशने आणि शालेय-महाविद्यालयीन विद्यार्थ्यांसाठी खेळ यांचे दालनही असणार आहे. भारत निवडणूक आयोगाने मतदार जागृतीसंबंधी निवडणूक साक्षरता मंडळ, चुनाव पाठशाळा, मतदार जागृती मंच ही व्यासपीठे तयार केली आहेत. यासंबंधी व्यासपीठे, शाळा- महाविद्यालये, गावा-परिसरांमध्ये, कार्यालयामध्ये स्थापन करण्यासंबंधीची मार्गदर्शक पुस्तिकाही या दालनात उपलब्ध करून देण्यात येणार आहे.

विद्यार्थी व शिक्षक यांनी मोठ्या संख्येने या दालनाला भेट देऊन लोकशाही संबंधीचे ल्युडो, सापशिडी यांसारखे खेळ तसेच व्यासपीठे समजून घ्यावीत, असेही उप जिल्हा निवडणूक अधिकारी स्वाती थविल यांनी प्रसिद्धी पत्रकात नमूद केले आहे.निवडणुकांमुळे लोकशाहीचा ढाचा अबाधित राहतो, यासाठी समाजातील सर्जनशील घटक विविध पातळ्यांवर काम करत असतात. लेखक हा सामान्य माणसाचा आवाज व्यवस्थेपर्यंत पोहोचवणारा एक महत्त्वाचा घटक आहे.

लेखक आणि त्याची लेखणी व त्यांची हीच भूमिका केंद्रस्थानी ठेवून या परिसंवादात ज्येष्ठ संपादक दिनकर गांगल, मराठी भाषेच्या चळवळीतले प्रा. कौतिकराव ढाले-पाटील, सामाजिक कार्यकर्ते रवींद्र रुक्मिणी पंढरीनाथ, पत्रकार आणि संपादक इब्राहीम अफगाण व दीप्ती राऊत, मुख्य निवडणूक अधिकारी श्रीकांत देशपांडे आदी मान्यवर यात सहभागी होणार आहे. या परिसंवादाचे सूत्रसंचालन मुंबई विद्यापीठातील राज्यशास्त्राचे प्राध्यापक डॉ. दीपक पवार करणार असल्याचेही उपजिल्हाधिकारी तथा उप जिल्हा निवडणूक अधिकारी स्वाती थविल यांनी शासकीय प्रसिद्धी पत्रकान्वये कळविले आहे.