मुंबई -प्रतिनिधी
कोरोना विषाणू संसर्ग रोखण्यासाठी महानगरपालिका प्रशासन करित असलेल्या उपाययोजनांचा भाग म्हणून ठिकठिकाणी प्रतिबंधित क्षेत्र, अलगीकरण केंद्र, अन्न वितरण केंद्र आदी उपाययोजना करण्यात आल्या आहेत. परिमंडळ १ मध्ये या अंतर्गत पुरविण्यात येत असलेल्या सेवा-सुविधांची प्रत्यक्ष स्थिती पाहण्यासाठी अतिरिक्त महानगरपालिका आयुक्त (शहर) श्री. संजीव जयस्वाल यांनी विविध ठिकाणी भेट दिली.
प्रारंभी, उपआयुक्त (परिमंडळ १) श्री. हर्षद काळे यांच्या उपस्थितीत अतिरिक्त आयुक्त श्री. जयस्वाल यांनी ई विभाग कार्यालयामध्ये सविस्तर माहिती जाणून घेतली. यानंतर भायखळा परिसरात ताडवाडी प्रतिबंधित क्षेत्र, रिचर्डसन क्रूडास येथील कोरोना काळजी केंद्र (सीसीसी २) तसेच कम्युनिटी किचन, बी विभाग हद्दीतील हॉटेल बिस्मिल्ला तसेच नजम बाग येथील कोरोना काळजी केंद्र (सीसीसी १) या ठिकाणी उपलब्ध असलेल्या सेवा-सुविधांची पाहणी करण्यात आली. त्यानंतर ग्रँट वैद्यकीय जिमखाना व चर्नी रोड येथील मित्तल आयुर्वेदीक रुग्णालयामध्येही सीसीसी २ व्यवस्थेचे निरीक्षण करण्यासाठी श्री. जयस्वाल यांनी भेट दिली. डी विभागाच्या हद्दीतील एमपी मिल कम्पाऊंड येथे एसआरए इमारतीतील सीसीसी २ सुविधा, आदर्श पॅलेस हॉटेलमधील सीसीसी १ व्यवस्था, ए विभागातील सुंदर नगर आणि सुखदवाला येथे सीसीसी २ सेवेसह ए विभागामध्ये अन्न वितरणासाठी सुरु असलेल्या फूड किचनची व्यवस्था श्री. जयस्वाल यांनी प्रत्यक्ष पाहिली.
या क्षेत्रीय भेटीमध्ये अतिरिक्त आयुक्तांनी प्रतिबंधित क्षेत्रातील लोकांशी प्रत्यक्ष चर्चा केली. जीवनाश्यक वस्तुंचा पुरवठा योग्यरित्या होतो आहे किंवा कसे याबाबत विचारपूस केली. कोरोना केंद्रांमध्ये राहत असलेल्या व्यक्तिंच्या भेटी घेऊन त्यांना कोणकोणत्या बाबींमध्ये आणखी सुधारणा अपेक्षित आहेत, सध्या देण्यात असलेल्या सुविधांमध्ये समाधान वाटते किंवा कसे, याबाबत त्यांच्याशी चर्चा केली. कम्युनिटी किचनमध्ये कार्यरत कर्मचाऱयांना येणाऱया अडचणी, किचनमधून पुरवले जाणारे अन्नाचा दर्जा यांचेही श्री. जयस्वाल यांनी निरीक्षण करुन आवश्यक तेथे सुधारणा करण्याचे निर्देश संबंधित सहाय्यक आयुक्तांना दिले.
यावेळी सहाय्यक आयुक्त श्रीमती चंदा जाधव, नितीन आर्ते, चक्रपाणी अल्ले, प्रशांत गायकवाड, मकरंद दगडखैरे हे आपापल्या विभाग कार्यालयाच्या हद्दीत पाहणीप्रसंगी उपस्थित होते.