मुलुंड : शेखर चंद्रकांत भोसले
मुलुंड पश्चिम येथील नव्याने बनविण्यात आलेल्या रिद्धि-सिद्धी विलगिकरण कक्षामधील शौचालयात एका तरुणीचा संशयास्पद मृत्यु झाल्याची धक्कादायक घटना समोर आली आहे.
५ मे रोजी मुलुंड येथील रिद्धि-सिद्धी विलगिकरण कक्षात एका तरुणीला ठेवण्यात आले होते. ही तरुणी एका कोरोनाग्रस्ताच्या वाढदिवसाला गेली होती व तेथेच तिला संसर्ग झाला होता. खबरदारीचा उपाय म्हणून तिला मुलुंडमधील विलगिकरण कक्षात ठेवण्यात आले होते. तिथे तिची कोविड १९ चाचणी करण्यात आली होती परंतु चाचणीचा रिपोर्ट अद्याप आला नव्हता. सूत्रांनी दिलेल्या माहितीनुसार काही दिवसांपूर्वी तिला क्षयरोगाची बाधा झाली होती. त्यामुळे तिच्यावर क्षयरोगाशी संबंधित उपचार चालू होते. शुक्रवारी संध्याकाळच्या वेळेत ही तरुणी शौचालयात गेली, परंतु बराच वेळ झाला तरी ती बाहेर न आल्याने तेथील इतरांनी दरवाजा ठोकावून पाहिला परंतु आतून काहीच उत्तर न आल्याने अखेर विलगिकरण कक्षाच्या कर्मचाऱ्यांनी दरवाजा तोडून आत प्रवेश केला असता सदर तरुणी बेशुद्धावस्थेत आढळून आली. तिला उपचारासाठी रुग्णालयात दाखल करण्यात आले परंतु तोपर्यंत तिचा मृत्यु झाला होता.
दुसऱ्या दिवशी सदर तरुणीचा कोरोना रिपोर्ट निगेटिव्ह आला. त्यामुळे तिचा मृत्यु क्षयाचा स्ट्रोक आल्याने झाला असल्याचे प्रथमदर्शनी दिसून येत असल्याची माहिती मुलुंड पोलिसांकडून देण्यात आली. मुलुंड पोलिसांनी मृत्यूची नोंद केली असून पुढील अधिक तपास याप्रकरणी सुरू केला आहे.