मुलुंड : शेखर चंद्रकांत भोसले
थोडयाच दिवसांत पावसाचे आगमन होणार असल्याने पावसाचे पाणी साचून मुलुंड, भांडूप परिसर तुंबू नये यासाठी पालिकेने पावसाळापूर्व नालेसफाईच्या कामाला येथे सुरुवात केली असून पालिकेचे सफाई कामगार नाल्यात उतरून नाल्यातील गाळ, माती, कचरा काढून नाला साफ करतानाचे चित्र सर्वत्र दिसत आहे. पावसाळ्यातील पाण्यामुळे परिसर तुंबू नये यासाठी पावसाळा यायच्याआधी पालिकेतर्फे पदपथाखालून जाणारी ड्रेनेज लाइन्स तसेच रस्त्याखालून जाणारी भूमिगत मलनिस्सारण लाइन्स प्रत्येक वर्षी साफ केल्या जातात. मुलुंड, भांडूप परिसरात या नाले साफसफाईच्या कामाला, पालिकेने सुरुवात केली असून पालिकेचे कंत्राटदार त्यांच्या सफाई कामगारांमार्फत ड्रेनेज व मलनिस्सारण लाइन्स साफ करताना दिसत आहेत. ठिकठिकाणी रस्त्यावर या सफाईच्या वेळी कामगारांनी नाल्यातून काढलेला गाळ, कचरा, प्लास्टिकच्या बाटल्या रस्त्याच्या कडेला पडलेला दिसून येत आहे. हा ओला कचरा, माती सूकल्यावर पालिकेच्या डंपरमध्ये टाकून उचलला जाणार असून नंतर तेथील रस्ता स्वच्छ केला जाणार असल्याचे पालिका अधिकाऱ्यांनी सांगितले.