मुलुंड : शेखर चंद्रकांत भोसले
कोरोनाच्या पार्श्वभूमीवर लॉकडाऊनच्या काळात संपूर्ण पोलिस दल कायदा व सुव्यवस्था राखण्यासाठी तसेच नागरिकांना कोरोनाचा संसर्ग होवू नये यासाठी आपला जीव धोक्यात घालून २४ तास बंदोबस्तावर तैनात आहेत व नाक्यानाक्यावर, रस्त्यावर, गल्लीबोळात एखाद्या योद्ध्यांप्रमाणे नागरिकांची सुरक्षा करीत आहेत. त्यामुळेच अनेक पोलिसांना कोरोनाची लागण झाली असून त्यात काही पोलिसांना जीव देखील गमवावा लागला आहे. मुलुंडमध्ये देखील अश्याच प्रकारे नागरिकांचे कोरोनापासून रक्षण करणाऱ्या नवघर पोलिस ठाण्याच्या एका हवालदाराला कोरोणाची लागण झाली असल्याचे समोर आले आहे.
नवघर पोलिस ठाण्याचे एक हवालदार, जे ऐरोली नाक्यावर बंदोबस्तासाठी तैनात होते. या नाक्यावर मजुरांचे येणारे लोंढे आणि अनावश्यक फिरणाऱ्या वाहनांना चाप लावण्यासाठी हे हवालदार कार्यरत होते. सोमवारी त्यांना ताप आणि खोकला जाणवू लागल्याने त्यांना सुट्टी देण्यात आली होती. त्यांची वैद्यकीय चाचणी केली असता ते कोरोना पॉज़िटिव असल्याचे समोर आले. सध्या त्यांच्यावर ठाण्यातील एका रुग्णालयात उपचार सुरू असून उपचाराला ते प्रतिसाद देत असल्याचे सूत्रांनी दिलेल्या माहितीवरून समजले.