जळगाव. दि. 14- जिल्ह्यातील खरीप हंगामासाठी नाफेडमार्फत शासनाच्या आधारभूत किंमत योजनेंतर्गत मुग, उडीद व सोयाबीन खरेदी केंद्र सुरु करण्याचे नियोजन आहे. खरेदी केंद्र सुरू करण्यासाठी इच्छूक संस्थांनी आपले अर्ज 20 ऑगस्ट, 2019 रोजी सायंकाळी 5 वाजेपर्यंत जिल्हा मार्केटिंग अधिकारी कार्यालय, देखरेख संघाची इमारत, युनिटी चेंबर्स, गणेश कॉलनी, जळगाव या कार्यालयात आवश्यक त्या कागदपत्रांसह सादर करावेत.
इच्छूक संस्थांनी केंद्र मागणीसाठी अर्ज सादर करण्यापूर्वी पुढील अटी व शर्तींची नोंद घ्यावी. जिल्हा अथवा तालुकास्तरावरील अ वर्ग सभासद असलेले खरेदी विक्री संघ, पणन व प्रक्रीया सहकारी अ वर्ग सभासद संस्था, ज्या ठिकाणी वरील दोन्ही अ वर्ग सभासद संस्था कार्यरत नाहीत त्याठिकाणी इतर सहकारी संस्थेस ब वर्ग सभासद करून घेवून खरेदीचे काम देणे, खाजगी बाजार समिती असा प्राधान्यक्रम राहील.
खरेदी करणाऱ्या संस्थेकडे साधनसामुग्री व मनुष्यबळ उपलब्ध असल्याचा सहाय्यक निबंधक, सहकारी संस्था यांचा दाखला आवश्यक आहे. मॉयश्चर मिटर, चाळणी, ताडपत्री, संगणक, संगणक चालवण्याची क्षमता असलेला जनरेटर, स्कॅनर असलेला स्मार्ट फोन, संगणक हाताळणेकरिता प्रशिक्षित असलेला सेवकवर्ग व इलेक्टॉनिक वजनकाटा असणे आवश्यक आहे.
वखार महामंडळाच्या गोदामात साठवणूकीपुर्वी संस्थेचे स्वत:चे अथवा भाड्याचे गोदाम असावे. अन्नधान्य अथवा कडधान्य व तेलबिया इत्यादि खरेदी विक्रीचा किमान 1 वर्षाचा अनुभव असावा, खरेदी केंद्र चालविण्याकरीता आवश्यक कर्मचारी असावे काळ्या यादीत किंवा अपहार किंवा फौजदारी गुन्हा अशा प्रकारची करवाई झालेली नसावी. मागील तीन वर्षाचे सनदी लेखापाल अथवा शासकीय लेखापरिक्षक यांनी साक्षांकित केलेले ताळेबंद पत्रके संस्थांनी सादर करावीत, पॅनकार्डची प्रत, जीएसटी नोंदणी प्रमाणपत्र, संस्थेकडे 10 लाख खेळते भांडवल असल्याचे बँकेचे प्रमाणपत्र अथवा बँक पासबुकची नोंद असावी. अशाप्रकारे अटी व शर्तींची पुर्तता करणाऱ्या संस्थांनी केंद्र नोंदणीसाठी 20 ऑगस्ट, 2019 रोजी सायंकाळी 5 वाजेपर्यंत जिल्हा मार्केटिंग कार्यालय, जळगाव या कार्यालयाकडे अर्ज सादर करावेत, असे आवाहन जिल्हा मार्केटिंग अधिकारी यांनी एका प्रसिध्दी पत्रकान्वये केले आहे.