दोंडाईचा जवळ बस-कंटेनरच्या भीषण अपघातात १३ ठार; ४० जखमी

शहादा :- धुळ्यातील शिंदखेडा तालुक्यातील दोंडाईचा ते निमगुळ रस्त्यावर रविवारी रात्री औरंगाबाद -शहादा एसटी बसला भरधाव वेगाने येणाऱ्या कंटेनरने जोरदार धडक दिल्याने झालेल्या भीषण अपघात झाला. या अपघातात १३ प्रवासी जागीच ठार झाले, तर ४० जखमी झाल्याची घटना घडली. कंटेनरची धडक एवढी भीषण होती की त्यात संपूर्ण बस कापली गेली. दरम्यान, अपघातातील जखमींना तातडीने दोंडाईचा व धुळे येथील रुग्णालयात हलवण्यात आले आहे.
औरंगाबाद -शहादा बस (क्र.एम.एच. २०-बी.एल. ३७५६) ही शहादा येथे येत असताना निमगुळ-दोंडाईचादरम्यान समोरून भरधाव वेगाने येणाऱ्या कंटेनरने जोरदार धडक दिली. त्यात संंपूर्ण बस उजव्या बाजूने कापली गेली. त्यात बसचालक मुकेश पाटील यांच्यासह १३ प्रवासी जागीच ठार झाले तर अन्य प्रवासी गंभीर जखमी झाले. मृतांमध्ये ९ पुरुष व चार महिला प्रवाशांचा समावेश आहे. रात्री १.३० वाजता दोंडाईचा कॉटेज रुग्णालयात ९ मृतदेह आणले होते.