<
जळगाव(प्रतिनिधी)- जिल्ह्यातील गरजू, गुणवंत विद्यार्थ्यांनी त्यांचे शिक्षण निर्विघ्नपणे पूर्ण करावे, स्वतःला सक्षम बनवावे या उद्देशाने माजी मंत्री सुरेशदादा जैन यांच्या मार्गदर्शनाखाली श्रीमती प्रेमाबाई भिकमचंदजी जैन उच्चशिक्षण शिष्यवृत्ती योजना जून २००८ मध्ये जाहीर करण्यात आली. त्या अनुषंगाने यावर्षी सुद्धा एसडी-सीड लाभार्थ्यांना शिष्यवृत्तीचे नुतनीकरण करण्यात येत आहे. गेल्या चौदा वर्षात जळगाव जिल्ह्यातील सुमारे १४३०० हून अधिक विद्यार्थ्यांनी शिष्यवृत्तीचा लाभ घेतला आहे.“गुणवंत विद्यार्थ्यांमध्ये शैक्षणिक व उद्योजकीय कौशल्ये विकसित करून त्यांना जागतिक स्तरावर सक्षम बनविणे” हे ध्येय साध्य करण्यासाठी विद्यार्थ्यांच्या दृष्टीकोनातून विचार करता शिष्यवृत्तीचे हे कार्य अधिक सुलभ व्हावे व अधिकाधिक विद्यार्थ्यांना या योजनेचा लाभ मिळावा म्हणून एसडी-सीडच्या www.sdseed.in या वेबसाईटवर शिष्यवृत्तीकरिता विद्यार्थ्यांना ऑनलाईन अर्ज भरण्याची सोय उपलब्ध करून दिली आहे.
ऑनलाईन अर्ज भरून एसडी-सीड कडे पाठविण्याची प्रक्रिया:- एसडी-सिडच्या वेबसाईट वर शिष्यवृत्तीसाठी विद्यार्थ्यांना ऑनलाईन अर्ज यशस्वीरीत्या भरण्याविषयी सर्व विस्तृत माहिती व मार्गदर्शन तसेच आवश्यक त्या सूचना देण्यात आलेल्या आहेत. संपूर्ण अर्ज भरल्यानंतर पोच पावतीची प्रिंट घेऊन त्यासोबत आवश्यक व बंधनकारक असणारी सर्व कागदपत्रे जोडून विद्यार्थ्यांनी ते एसडी-सीड कार्यालय ७, शिवाजी नगर जळगाव येथे दिलेल्या मुदतीत पाठवायचा आहे.शिक्षणाच्या सर्वांगीण विकासासाठी आयोजिण्यात आलेल्या या शिष्यवृत्ती योजनेचा आर्थिकदृष्ट्या कमकुवत, गरजवंत व होतकरू विद्यार्थ्यांनी जास्तीत जास्त लाभ घेण्याचे आवाहन प्रकल्प प्रमुख सौ. रत्नाभाभी जैन, कार्यध्यक्षा मीनाक्षी जैन आणि निवड समिती प्रमुख डॉ. प्रसन्नकुमार रेदासनी यांनी केले आहे.
