जळगाव येथील विवाहितेची गळफास घेत आत्महत्या

जळगाव – महाबळ परिसरातील विवाहितेने राहत्या घरात आज सकाळी गळफास घेत आपली जीवनयात्रा संपवल्याची घटना उघडकीस आली. आपल्या मृत्युबाबत कुणालाही जबाबदार धरु नये असे तिने दोन ओळीच्या पत्रात लिहिले आहे.
याबाबत सविस्तर वृत्त असे की, शहरातील महाबळ परिसरातील चैत्रबन कॉलनी भागात तृप्ती शैलेंद्र त्रिवेदी (48) ही विवाहिता आपला मुलगा व सुनेसह रहात होती. तिचे पती सूरत येथे राहतात. चैत्रबन कॉलनी भागात तृप्ती त्रिवेदी आपला मुलगा व सुनेसह भाड्याच्या घरात राहून जिम चालवत होती. जिम साठी येणा-या प्रत्येकाच्या आहाराबाबत देखरेख ठेवाण्याची जबाबदारी तृप्ती यांच्यावर होती. आज सकाळी राहत्या घरात तृप्ती यांनी दोरीच्या मदतीने छताला  गळफास घेत आपली जीवनयात्रा संपवली.
या घटनेची माहिती मिळताच रामानंद नगर पोलिस स्टेशनचे कर्मचारी घटनास्थळी दाखल झाले. या प्रकरणी अकस्मात मृत्यूची नोंद घेण्यात आली. मयत तृप्ती यांचा मृतदेह सामान्य रुग्णालयात विच्छेदन कामी नेण्यात आला होता. मयत तृप्ती त्रिवेदी यांच्यावर अंत्यसंस्कार करण्यासाठी त्यांना सूरत येथे नेले जाणार असल्याची माहिती पुढे आली.
तृप्ती त्रिवेदी यांनी आपल्या सुसाइड नोट मधे आपल्या मृत्युबाबत कुणालाही जबाबदार धरु नये असे म्हटले आहे. दरम्यान त्यांनी आत्महत्या का केली? याचे गुढ कायम राहिले असून परिसरात खळबळ माजली आहे