<
जळगाव(प्रतिनिधी)- वाढत्या महागाईविरोधात अखिल भारतीय काँग्रेस कमिटीतर्फे १४ ते २९ नोव्हेंबर दरम्यान जनजागरण अभियानाचे आयोजन करण्यात आले आहे. हे जनजागरण अभियान जिल्ह्यात यशस्वी करणार असल्याचा विश्वास याप्रसंगी महाराष्ट्र काँग्रेस कमिटीचे उपाध्यक्ष तथा माजी खासदार डॉ.उल्हास पाटील यांनी व्यक्‍त केला आहे.
यासंदर्भात पीसीसी अर्थात प्रदेश काँग्रेस समितीतर्फे प्रसिद्धीस दिलेल्या पत्रात नमुद केल्यानुसार येत्या १४ ते २९ नोव्हेंबर दरम्यान जनजागृती अभियानाचे नियोजन केले असून त्यासाठी विधानसभा क्षेत्रात सक्रीय राहण्यासाठी दोन ते तीन दिवसांचे प्रशिक्षण देण्यात आले असून १० प्रशिक्षकांद्वारे मतदान केंद्रात ब्लॉक अध्यक्ष, कार्यकर्त्यांना प्रशिक्षण देणार आहे.
याशिवाय दररोज सकाळी ६ वाजता प्रभात फेरी काढण्यात येणार आहे. तसेच या कार्यक्रमांचे प्रक्षेपण सोशल मिडीयाद्वारे दाखविले जाणार असल्याचे अखिल भारतीय काँग्रेस कमिटीचे महासचिव के.सी.वेणुगोपाल यांनी प्रसिद्धीस दिले आहे. तरी पदाधिकारी, कार्यकर्त्यांनी या जनजागरण अभियानात सहभागी व्हावे, असे आवाहन जिल्हा काँग्रेस कमिटीने केले आहे.
