अमळनेर शहर प्रतिनिधी : अमळनेर तालुक्यातील चौबारी गावातून राज्य महामार्ग क्रमांक 6 जातो, मात्र गावातून अगदी मधोमध जाणाऱ्या या रस्त्यावर नवीन बस स्थानकाजवळ सुरक्षिततेच्या दृष्टिकोनातून गतिरोधक नसल्याने वारंवार अपघात होत असल्याने गावकाऱ्यांमध्ये भीतीचे वातावरण पसरले आहे.
विशेष म्हणजे ग्रामपंचायततर्फे गतिरोधकाची मागणी करूनही अद्यापपर्यंत पुरेसे गतिरोधक बसविण्यात आले नाहीत. सामाजिक कार्यकर्ता तथा पत्रकार रवींद्र मोरे यांनी सार्वजनिक बांधकाम विभागाकडे तगादा लावल्याने तूर्तास वळण रस्त्यावर दोन गतिरोधक बसविण्यात आले आहेत. मात्र नवीन बस स्थानकाजवळ नसल्याने वारंवार याठिकाणी अपघात होत आहेत.
गतिरोधक नसल्याने आज दुपारच्या सुमारास बस स्थानकाजवळ दोन चारचाकी वाहनांमध्ये जोरदार धडक झाली. यात दोन्ही कारांसह रस्त्यालगत असलेल्या नरेश भाऊराव पारधी व कृष्णा चुडामन पाटील यांच्या दुचाकींचेही नुकसान झाले. सुदैवाने जीवितहानी झाली नाही. भविष्यात जीवितहानी होऊ नये म्हणून तात्काळ गतिरोधक बसविण्यात यावेत, अशी गावकऱ्यांची मागणी आहे.
