महाराणा प्रताप माध्यमिक व उच्च माध्यमिक विद्यालयात कोवीड लसीकरण संपन्न

जळगाव, (प्रतिनिधी) – दि पूर्व खान्देश हिंदी शिक्षण संस्था संचलित महाराणा प्रताप माध्यमिक व उच्च माध्यमिक विद्यालय, प्रेमनगर, जळगाव या विद्यालयात जळगाव शहर महानगरपालिका व इंडियन रेडक्रॉस सोसायटी यांच्या संयुक्त विद्यमाने विद्यालयातील विद्यार्थांसाठी मोफत लसीकरणाचे आयोजन करण्यात आले होते.

विद्यालयातील 12 ते 14 वयोगटासाठी कार्बेव्हॅक्स तर १५ ते १८ वयोगसाठी कोव्हॅक्सिन या लसी विद्यार्थ्यांना देण्यात आल्या. याप्रसंगी आरोग्य विभागाच्या कर्मचारी, परिचारीका साधना चव्हाण, दिपाली भिसे, रजनी सूर्यवंशी तसेच आशा वर्कर मुनिता पाटील यांचे सहकार्य लाभले. प्रारंभी विद्यालयाचे मुख्याध्यापक श्री.डी.एस. पाटील यांनी सर्व आरोग्य कर्मचारी व सहकार्यांचे पुष्पगुच्छ देवून स्वागत केले. यावेळी पर्यवेक्षक श्री.डी.बी. सोनवणे व कनिष्ठ विभाग प्रमुख श्री.गजेंद्र पाटील उपस्थित होते. प्रथम लस घेणाऱ्या विद्यार्थिनींचे स्वागत मान्यवरांनी पुष्प देवून केले. या लसीकरणाचा विद्यालयातील सर्वच विद्यार्थ्यांनी लाभ घेतला. या कार्यक्रमासाठी विद्यालयातील सर्व शिक्षक व शिक्षकेत्तर कर्मचारी तसेच आरोग्य विभागातील व रेडक्रॉस सोसायटी कर्मचाऱ्यांनी सहकार्य केले. कार्यक्रमाचे सूत्रसंचालन श्री.एस.व्ही. पाटील यांनी केले. तर आभार विद्यालयाचे पर्यवेक्षक श्री.डी.बी. सोनवणे यांनी मानले.