<
Girl Commit Suicide: वडिलांनी अभ्यास करायला सांगितलं म्हणून एक ९ वर्षांच्या मुलीने गळफास घेत आत्महत्या केल्याची धक्कादायक घटना घडली आहे. तामिळनाडूतील पेरियाकुप्पम येथे ही घटना घडली.
चेन्नई: तामिळनाडूतील पेरियाकुप्पम येथून एक वेदनादायक घटना समोर आली आहे. येथे एका ९ वर्षीय चिमुकलीने किरकोळ कारणावरुन आत्महत्या केली आहे. पालकांनी तिला अभ्यास करण्यास सांगितलं म्हणून तिने हे धक्कादायक पाऊल उचलल्याची माहिती आहे. या नऊ वर्षांच्या मुलीला तिचे शेजारी ‘इन्स्टा क्वीन’ म्हणत असत.
प्रतीक्षा असं या ९ वर्षांच्या इन्स्टा क्वीनचं नाव आहे. तिचे वडील कृष्णमूर्ती यांनी मुलीला आजीच्या घराजवळ खेळताना पाहिलं, तेव्हा त्यांनी तिला घरी जाऊन अभ्यास करण्यास सांगितलं आणि तिला घराच्या चाव्या दिल्या.
यानंतर ते दुचाकीमध्ये पेट्रोल भरण्यासाठी बाहेर गेले. रात्री ८.१५ वाजेच्या सुमारास ते घरी परतले असता त्यांना घर आतून बंद असल्याचं दिसलं. त्यांनी दार ठोठावलं, मुलीला दरवाजा उघडण्यास सांगितलं. पण, प्रतीक्षाने प्रतिसाद न दिल्याने कृष्णमूर्ती घाबरले आणि त्यांनी मागील बाजूची खिडकी तोडून आत प्रवेश केला. तेव्हा त्यांना त्यांची मुलगी टॉवेलने गळफास घेतलेली आढळली. त्यांनी तातडीने तिला रुग्णालयात दाखल केले मात्र तिथे डॉक्टरांनी तिला मृत घोषित केले. याप्रकरणी पोलिसांनी तपास सुरू केला आहे.
किर्तनकारांना नावं ठेवतात अन् गाण्याच्या कार्यक्रमात शिट्ट्या; इंदुरीकर महाराजांचा गौतमीवर निशाणा
विशेष म्हणजे गेल्या वर्षी डिसेंबरमध्येही असेच एक प्रकरण समोर आले होते. उत्तर प्रदेशची राजधानी लखनऊमध्ये मोबाईलवर गेम खेळण्यास नकार दिल्याने एका १० वर्षांच्या मुलाने आत्महत्या केली होती. आईने रागावल्याने या मुलाने इतकं टोकाचं पाऊल उचललं होतं. हा मुलगा अनेक दिवसांपासून शाळेत जात नव्हता, तो दिवसभर मोबाईलवर गेम खेळत राहायला. त्यामुळे त्याच्या आईने त्याचा फोन काढून घेतला होता. त्यामुळे त्याने थेट आत्महत्येसारखं टोकाचं पाऊल घेतलं.
