जळगाव – (प्रतिनिधी) – कवयित्री बहिणाबाई चौधरी उत्तर महाराष्ट्र विद्यापीठाच्या वतीने वार्षिक नियोजनानुसार दिवाळी/ हिवाळी सुट्या या दिनांक 17 डिसेंबर 2023 ते 31 डिसेंबर 2023 दरम्यान जाहीर करण्यात आलेल्या आहेत. तसेच दिवाळीच्या पाच दिवस सुट्ट्या देण्यात आलेल्या आहेत या दोन्हीही सुट्या सलग देण्यात याव्यात या संदर्भात आज एन.मुक्ता.च्या वतीने एन. मुक्ताचे केंद्रीय अध्यक्ष प्रा. डॉ. नितीन बारी यांच्या नेतृत्वात निवेदन देण्यात आले. त्यात निवेदन केले आहे की, दिवाळीच्या सुट्ट्या या प्राध्यापकांना दोन टप्प्यांमध्ये दिल्या जातात, त्या सलग देण्यात याव्यात. वास्तविकत: भारतीय संस्कृतीनुसार दिवाळी सणाचे महत्त्व अनन्यसाधारण आहे.
त्यामुळे सणासुदीच्या काळात प्राध्यापकांना आपल्या कुटुंबासोबत राहता यावे, कुटुंबीयांसोबत सण साजरा करता यावा तसेच बहुतांश प्राध्यापक हे त्यांच्या गावापासून लांब नोकरीला आहेत त्यामुळे सणासुदीच्या काळात आपल्या कुटुंबियासोबत जास्तीत जास्त दिवस राहता यावे म्हणून प्रवासाचे नियोजन करणे देखील शक्य होते.
दिवाळीमध्ये सणाला अनुसरून सलग सुट्या देण्यात याव्यात त्याचप्रमाणे दिवाळी दरम्यान विद्यार्थ्यांच्या परीक्षा व सुट्ट्यांचा देखील खूप गोंधळ होतो. जर परीक्षा सलग राहिल्या तर विद्यार्थ्यांच्या दृष्टिकोनातून देखील ते सोयीचे होईल म्हणून सुट्ट्यांचे नियोजनात बदल करून विद्यार्थी व प्राध्यापक दोन्हींना सोयीचे होईल अशा पद्धतीने विद्यापीठाने सुट्ट्यांचे नियोजन करावे असे निवेदन विद्यापीठाचे प्र.कलगुरू डॉ.प्रा. एस.टी. इंगळे यांना संघटनेच्या वतीने देण्यात आले. याप्रसंगी व्यवस्थापन परिषदेचे सदस्य प्रा. डॉ. शिवाजीराव पाटील, डॉ. भगवान चौधरी, प्राचार्य डॉ. एस आर पाटील, प्रा. डॉ. अमृत वळवी, प्रा. डॉ. सुरेश शेलार, प्रा. डॉ. नितीन बडगुजर उपस्थित होते.
