तंत्रज्ञानाच्या युगात कौटुंबिक बंध दृढ करण्याचे आवाहन – डॉ. ज्योती भोळे

धनाजी नाना चौधरी विद्या प्रबोधिनी संचलित लोकसेवक मधुकरराव चौधरी समाजकार्य महाविद्यालयात युवती सभा अंतर्गत अँड डॉ ज्योती भोळे यांचे व्याख्यान संपन्न:

जळगाव – (प्रतिनिधी) – लोकसेवक मधुकरराव चौधरी समाजकार्य महाविद्यालयात विद्यार्थी विकास विभागाच्या वतीने युवती सभेचे आयोजन करण्यात आले. या कार्यक्रमाचे उद्घाटन ॲड. डॉ. ज्योती भोळे यांच्या हस्ते झाले. त्यांनी “प्रचलित तंत्रज्ञान आणि समाजात बदलणारी कौटुंबिक संस्था” या विषयावर विद्यार्थिनींना मार्गदर्शन केले.

महिला मंच प्रमुख डॉ. सुनीता चौधरी यांनी प्रास्ताविक करताना युवती सभा ही विद्यार्थिनींसाठी स्वतंत्र व्यासपीठ असून त्यांच्या सर्वांगीण विकासासाठी विविध उपक्रम राबवले जातात, असे सांगितले.

डॉ. ज्योती भोळे यांनी तंत्रज्ञानाचे सकारात्मक व नकारात्मक परिणाम, कौटुंबिक संस्थेतील बदल, महिलांचे सक्षमीकरण, लिव्ह-इन रिलेशनशिप, व्हर्च्युअल कुटुंब, ऑनलाइन शॉपिंगसारखे आर्थिक परिणाम या विषयांवर सविस्तर विचार मांडले. *तंत्रज्ञान टाळणे शक्य नाही; मात्र त्याचा सुज्ञ व संतुलित वापर करून कौटुंबिक बंध अधिक दृढ करणे ही काळाची गरज आहे,* असे त्यांनी स्पष्ट केले.

कार्यक्रमाचे अध्यक्षस्थान प्राचार्य डॉ राकेश चौधरी यांनी भूषविले. कार्यक्रमास डॉ. कल्पना भारंबे, डॉ. भारती गायकवाड, डॉ. भूषण भामटेराजपूत, सौ गायत्री अत्तरदे उपस्थित होते