नाशिक- (प्रतिनिधी)-नाशिक शहरात मोकाट कुत्र्यांचा विळखा दिवसेंदिवस घट्ट होत असताना, जेल रोड परिसरात आणखी एक धक्कादायक घटना घडली आहे. हॉली फ्लॉवर हायस्कूलच्या मागील वस्तीमध्ये राहणाऱ्या एका तरुणीवर मोकाट कुत्र्यांनी हल्ला केला असून ती गंभीर जखमी झाली आहे.
ही घटना १० नोव्हेंबर रोजी रात्री १० ते १०:३० च्या दरम्यान घडली. सदर तरुणी घरा जवळच्या कामानिमित्त बाहेर गेली असता १० ते १२ मोकाट कुत्र्यांनी अचानक तिच्याभोवती घेरा घातला आणि जोरदार हल्ला चढवला. सतत चावा घेत तीच्यावर हल्ला केल्याने ती गंभीर जखमी झाली. परिसरातील नागरिकांनी आरडाओरड ऐकून धाव घेत कुत्र्यांना हुसकावून लावले आणि जखमी तरुणीला तात्काळ जवळच्या खाजगी रुग्णालयात दाखल करुन तिच्यावर उपचार सुरू केले आहेत.
मनपाच्या कुत्रेमुक्ती मोहिमेचा फज्जा
नाशिक महानगरपालिकेने वेळोवेळी मोकाट कुत्र्यांना पकडण्यासाठी मोहिमा राबवण्याचा दावा केला असला तरी प्रत्यक्षात मात्र कुत्र्यांची संख्या नियंत्रणात नसून वाढतानाच दिसते, अशी नागरिकांची तीव्र नाराजी व्यक्त होत आहे.
स्थानिकांचा आरोप—
“तक्रार केली तरी मनपा प्रशासन हालचाल करत नाही. एखादी मोठी दुर्घटना घडल्याशिवाय त्यांना जागच येत नाही.”
जेल रोड, इंदिरानगर, पंचवटी, सीबीएस परिसरासह संपूर्ण शहरात रात्रीच्या वेळी मोकाट कुत्र्यांचे गट फिरताना दिसत असून विशेषतः विद्यार्थी, महिलांमध्ये भीतीचे वातावरण आहे.
नागरिकांकडून मनपाला सवाल
✅ कुत्र्यांना पकडण्याची मोहिम का थांबली?
✅ किती कुत्र्यांचे बंध्याकरण झाले?
✅ जबाबदारी कोणाची?
✅ हल्ल्यांवरील आकडेवारी सार्वजनिक का नाही?
तातडीने उपाययोजना करण्याची मागणी
परिसरातील नागरिक व सामाजिक संघटनांनी या घटनेची मनपा आयुक्तांकडे तक्रार दाखल करण्याचा निर्णय घेतला आहे.
त्यांची मागणी —
मोकाट कुत्र्यांना ताबडतोब पकडून व्यवस्थापन करावे
मोकाट कुत्र्यांच्या हल्ल्यांवर नियंत्रणासाठी तातडीचे पथक स्थापन करावेही घटना नाशिक महापालिकेच्या निष्क्रीयतेवर प्रश्नचिन्ह उभे करते.ना
गरिकांचा जीव धोक्यात घालून प्रशासन किती काळ डोळेझाक करणार? यापुढे असे हल्ले टाळण्यासाठी ठोस उपाययोजना करण्याची मागणी जोर धरत आहे.
