कर्नाटकात राजकीय भूकंप होणार का? हा प्रश्न सध्या चर्चेत आहे. कारण काँग्रेसचे ८ तर जेडीएसचे ३ आमदार राजीनामा देण्याच्या तयारीत आहेत. जर १२ आमदारांनी राजीनामे सोपवले तर हे सरकार अल्पमतात येऊ शकते. मागच्या वर्षी कर्नाटक विधानसभेची निवडणूक पार पडली. या निवडणुकीत भाजपाने १०४ जागा मिळवल्या. मात्र पूर्ण बहुमत नसल्याने सर्वात मोठा पक्ष ठरूनही भाजपाला सत्ता काबीज करता आली नाही. त्यानंतर भाजपाला दूर ठेवण्यासाठी काँग्रेस आणि जेडीएस एकत्र आले. जेडीएसचे कुमारस्वामी हे मुख्यमंत्रीपदावर विराजमान झाले. मात्र आता सत्तेतल्या दोन पक्षांमधलेच १२ आमदार राजीनाम्याच्या तयारीत आहेत. त्यामुळे दोन्ही पक्षांच्या अडचणी वाढणार आहेत.
दरम्यान कोणीही राजीनामा देणार नाही मी काँग्रेस आणि जेडीएसच्या सगळ्या आमदारांशी चर्चा करणार आहे असं कर्नाटकचे मंत्री डी. के. शिवकुमार यांनी म्हटलं आहे. दरम्यान आम्ही राजीनामा देत आहोत कारण आमच्याकडे सातत्याने दुर्लक्ष होतं आहे. याबाबत कोणालाही दोष देणार नाही असंही रामलिंगा रेड्डी या आमदाराने म्हटले आहे.
