<
जळगाव(प्रतिनिधी)- शहरात कोरोनाचा रुग्ण पॉझिटिव्ह आढळल्यानंतर मेहरूण परिसर निर्जंतुकीकरण करण्यात आला. शनिवारी रात्रीच महापौर भारती सोनवणे यांनी परिसराला भेट देऊन माहिती जाणून घेत निर्जंतुकीकरण करण्याच्या सूचना प्रशासनाला दिल्या होत्या. त्यानुसार आज निर्जंतुकीकरणास प्रारंभ झाला आहे. महापालिकेच्या आरोग्य विभागाची पूर्ण यंत्रणा आज सकाळी ९ वाजेपासून मेहरूण परिसरात दाखल झाली. यावेळी महापालिका कर्मचाऱ्यांनी मेहरूण येथे घरोघरी जाऊन कुटुंबात किती सदस्य आहे? कोणी आजारी आहे का? याची माहिती जाणून घेतली. मलेरिया विभागाचे ८-१० जणांचे पथक व दवाखाना विभागाचे ४० कर्मचारी परिसरात फिरून मोहीम राबवित होते. यावेळी नगरसेवक कैलास सोनवणे, प्रशांत नाईक यांनी देखील परिसराची पाहणी केली. दरम्यान, आयुक्त सतीश कुलकर्णी यांनी भेट देऊन माहिती जाणून घेतली. मलेरिया विभागातर्फे निर्जंतुकीकरण प्रसंगी सहाय्यक आयुक्त पवन पाटील, मलेरिया विभागाचे डॉ. विकास पाटील, वैद्यकीय अधिकारी डॉ. राम रावलानी, मलेरिया विभागाचे सुधीर सोनवाल, आरोग्य निरीक्षक आनंद सोनवाल, मुकादम रईस शेख व कर्मचारी यांनी संपूर्ण भागात ब्लिचिंग पाणीने फवारणी केली.
