मलकापूर – (प्रतिनिधी)
जळगाव जिल्ह्यातील दुचाकीचोरांच्या टोळीला मलकापूर पोलिसांनी जेरबंद केले व या टोळीकडून २० मोटारसायकली हस्तगत करण्यात आल्या आहेत.
याबाबत पत्रकार परिषदेत अधिक माहिती देतांना मलकापूरचे उपविभागीय पोलीस अधिकारी अभिनव त्यागी व पोलीस निरिक्षक विजयसिंग राजपूत यांनी सदर टोळीकडून २० दुचाकी जप्त करीत पाच जणांना अटक केल्याची तसेच हे सर्वजण जळगाव जिल्ह्याचे रहिवासी असल्याची माहिती दिली. याप्रसंगी टोळीचा म्होरक्या हा मुक्ताईनगर तालुक्यातील रहिवासी असल्याचेही सांगण्यात आले.
आकाश उर्फ संतोष रावळकर आणि रामशंकर भोलवणकर यांच्याकडे विनाक्रमांकाची दुचाकी आढळून आल्याने मलकापूर पोलिसांच्या गोपनीय शाखेच्या पथकाने त्यांना ताब्यात घेतले. दोघांची कसून चौकशी केली असता त्यांनी पवन जवरे, संतोष कवळे, अमरदीप उबाळे आणि प्रशांत बोरले हे त्याचे साथीदार असल्याची माहिती दिली.
दरम्यान, पोलिसांनी ह्या सर्वांना ताब्यात घेतले असल्याने या टोळीच्या तपासातून दुचाकी चोरीची अनेक प्रकरणे उघडकीस येण्याची शक्यता वर्तविली जात आहे.
