जळगाव – (प्रतिनिधी)
दररोज एसटी बसने प्रवास करणाऱ्या प्रवाशांसाठी एक आनंदाची बातमी आहे. महाराष्ट्र राज्य परिवहन महामंडळ ‘ई-बस’ ही नवीन योजना राबवित असल्यामुळे प्रत्येक नागरिकाचा प्रवास सुखकर करण्यासाठी शहरात लवकरच १०० इलेक्ट्रिक बस सेवेत दाखल होण्याचे वृत्त आहे.
याआधी नागरिकांना जुन्या ‘लालपरी’ डिझेल बसेसने प्रवास करताना दरवाजे, खिडक्यांचा खडखडाट आणि इंजिनचा घरघराट सहन करावा लागत होता. परंतु आता या नवीन तंत्रज्ञानाच्या चार्जिंगयुक्त बसेसमुळे सर्वसामान्य लोकांची या समस्येपासून सुटका होण्याबरोबरच प्रदूषण कमी होईल. सध्या जिल्ह्यातील ११ आगारांमध्ये सुमारे ८०० च्या वर लालपरी डिझेल बसेस प्रवाशांची सेवा करीत आहेत.
एसटीच्या ७५ व्या वर्धापनदिनी पुणे, मुंबईसारख्या महानगरात इलेक्ट्रिक बससेवा सुरू करण्यात आल्या आहेत. या धर्तीवर महामंडळ प्रशासनाचे जिल्ह्याच्या व्याप्तीनुसार बसेस देण्याचे धोरण आहे. त्यानुसार जिल्हा परिवहन विभागाकडून ४९ बसेसच्या मागणीत वाढ करण्यात आली असून, १०० ई-बसेसचा प्रस्ताव पाठविण्यात आला आहे.
निमआराम बसच्या प्रवासी भाड्यानुसार या ई-बसेससाठी प्रवासी भाडे आकारणी होईल, ज्यामुळे प्रवाशांना आरामदायी प्रवासाचा लाभ होणार असल्याची माहिती एसटी विभाग नियंत्रक भगवान जगनोर यांनी दिली.
