जामनेर तालुक्यातील टाकरखेडा जि.प मराठी शाळेचे ग्रेडेड मुख्याध्यापक प्रभाकर तुकाराम पाटील (पी.टी.पाटील )यांना श्री गुरुदेव सेवा आश्रम ट्रस्ट जामनेर तर्फे कोविड योद्धा म्हणून अध्यक्ष श्री श्याम चैतन्यजी महाराज यांच्या हस्ते सन्मानपत्राने देवून गौरविण्यात आले. कोरोना सारख्या भयंकर महामारीशी आज संपूर्ण देश लढत आहे. अशा कठीण काळात आपण स्वत:च्या जीवाची पर्वा न करता, महाराष्ट्र राज्यात शिक्षण सेवेच्या माध्यमातून समाजासाठी करीत असलेले सेवाकार्य अतुलनीय आहे. आम्हा सर्वांना आपला अभिमान असुन आपल्या या समाज कार्याबद्दल गुरूदेव सेवा आश्रम ट्रस्ट च्या वतीने आम्ही आपणास कोविड योद्धा सन्मानपत्राने सन्मानित करतो. असा उल्लेख सन्मानपत्रात केलेला आहे.
श्याम चैतन्यजी महाराज यांनी सांगितले की, कोविड काळात शैक्षणिक क्षेत्रात उल्लेखनीय कार्य करणाऱ्या शिक्षकांमधून मुख्याध्यापक पी.टी.पाटील यांना कोविड योद्धा म्हणून सन्मानपत्र देऊन गौरविण्यात आले आहे. पी.टी.पाटील पाटील यांचे शैक्षणिक कार्य हे उल्लेखनीय आहे. समाजासमोर ते विद्यार्थी हित जोपासणारे आदर्श शिक्षक आहेत. नाविन्यपूर्ण शैक्षणिक उपक्रम ते राबवतात म्हणून त्यांना गौरविण्यात आले आहे.
मुख्याध्यापक पी.टी.पाटील यांनी सन्मानपत्र स्विकारतांना सांगितले की, आपण समाजाचे काहीतरी देणे लागतो तसेच परिस्थितीची जाणीव ठेवून आपले काम हे प्रामाणिकपणे केले तर समाज त्याची दखल घेतो . आपण जो मोबदला घेतो त्या मोबदल्या इतके आपण काम केले पाहिजे तरच मनाला समाधान प्राप्त होते. याप्रसंगी चंद्रदिव आर्ट जामनेर चे संचालक गणेश भोईटे हे उपस्थित होते.
