जळगाव-(प्रतिनिधी)-गणेशोत्सवाचे औचित्य साधून श्री. चामुंडामाता होमिओपॅथी वैद्यकीय महाविद्यालय आणि श्री पी. ई. तात्या पाटील हॉस्पिटल, जळगाव यांच्या मार्फत संपर्क फाउंडेशन आणि भारत विकास परिषद कार्यालय जळगांव,येथे भव्य मोफत नेत्र व आरोग्य तपासणी शिबिराचे यशस्वी आयोजन करण्यात आले. या शिबिराचा फायदा संपर्क फाउंडेशनचे सेवेकरी, भारत विकास परिषदेचे सदस्य आणि त्यांच्या कुटुंबीयांनी मोठ्या संख्येने घेतला.
या शिबिरादरम्यान आलेल्या नागरिकांची सखोल नेत्र तपासणी, सर्वसाधारण आरोग्य तपासणी आणि फिजिओथेरपी तपासणी करण्यात आली. तसेच गरजूंना मोफत होमिओपॅथी औषधांचे वाटप करण्यात आले. शिबिरात होमिओपॅथी तज्ज्ञ डॉ. सुरेश अग्रवाल, डॉ. स्वाती सोनवणे, डॉ. किशोर देशमुख, डॉ. आशा शंकवार, नेत्रचिकित्सक डॉ. जयेश वाल्हे आणि फिजिओथेरपी तज्ज्ञ डॉ. सत्या चतुर्वेदी यांनी रुग्णांची मोफत तपासणी करून त्यांना योग्य वैद्यकीय सल्ला दिला. या कार्यात प्रशिक्षणार्थी विद्यार्थी बिभीषण पोळे, विशंभर ढगे, दीपाली बोर्डे, फिया पटेल, अविनाश जाधव, मनतशा खाटीक व प्रांजली महाजन यांनी विशेष सहकार्य केले.
हे आरोग्य शिबीर श्री. चामुंडामाता होमिओपॅथी वैद्यकीय महाविद्यालयाचे अध्यक्ष मा. श्री. पी. ई. तात्या पाटील, सचिव मा. श्री. राहुल पाटील, प्राचार्य डॉ. सुधांशू सिंग आणि रुग्णालय अधीक्षक डॉ. यशवंत पाटील यांच्या मार्गदर्शनाखाली व प्रेरणेने पार पडले.
गणेशोत्सवाच्या काळात महाविद्यालयाने राबवलेल्या या स्तुत्य उपक्रमाबद्दल संपर्क फाउंडेशनचे सेटलर श्री. प्रशांत महाजन आणि भारत विकास परिषदेचे श्री. अनिरुद्ध कोटाथाने यांनी आयोजकांचे विशेष आभार मानले.
