मुंबई, (प्रतिनिधी)- राज्यात संपूर्णपणे नसला तरी अंशत: लॉकडाऊन जाहीर करण्यात आला आले असल्याचं मंत्री नवाब मलिक यांनी आज जाहीर केलं.
राज्यात आठवड्यातील दोन दिवस लॉकडाऊन जाहीर करण्यात आला असून यापुढे शनिवार आणि रविवारी संपूर्ण राज्यात कडकडीत बंद असणार असल्याची माहिती राज्याचे अल्पसंख्याक मंत्री नवाब मलिक यांनी दिली आहे.
राज्यात कोरोना रुग्णांची संख्या झपाट्याने वाढत असल्याने मुख्यमंत्री उद्धव ठाकरे यांनी तातडीची बैठक बोलावून लॉकडाऊनबाबत चर्चा केली. त्यात राज्यात या पद्धतीचा लॉकडाऊन लागू करण्याचा निर्णय घेण्यात आला. बैठकीनंतर नवाब मलिक यांनी याबाबतची माहिती दिली.
राज्यात शुक्रवारी रात्री 8 वाजल्यापासून लॉकडाऊन सुरू होईल. तो सोमवारी सकाळी संपेल. दर आठवड्याला शनिवार आणि रविवारी राज्यात कडकडीत बंद राहणार आहे. फक्त यातून अत्यावश्यक सेवा वगळण्या आल्या आहेत. तसेच लॉकडाऊनची नियमावली उद्या रात्री 8 वाजता जारी करण्यात येणार असल्याचंही त्यांनी यावेळी सांगितलं.
