जळगाव-(प्रतिनिधी) – लोकसेविका श्रीमती वैशाली गायकवाड (वनपाल, वर्ग ३, वन विभाग पारोळा) आणि खाजगी इसम श्री. सुनील धोबी (श्रीकृष्ण सॉ मिलचे मालक, पारोळा) यांच्यासह एका अज्ञात वन विभागाच्या कर्मचाऱ्याविरुद्ध भ्रष्टाचार प्रतिबंधक अधिनियमांतर्गत गुन्हा दाखल करण्यात आला आहे.
या तिघांनी तक्रारदाराकडे सुरुवातीला रु. २,५०,०००/- (दोन लाख पन्नास हजार रुपये) लाचेची मागणी केली होती, जी तडजोडीअंती रु. १,००,०००/- (एक लाख रुपये) करण्यात आली.
गुन्ह्याची पार्श्वभूमी:
तक्रारदाराच्या भावाने शेतातील लिंबाची झाडे तोडून मालेगाव येथे नेण्यासाठी ट्रकमध्ये भरली होती. हा ट्रक सावित्री फटाके फॅक्टरीसमोर वन विभागाच्या वैशाली गायकवाड (वनपाल), एका कर्मचाऱ्याने आणि सुनील धोबी (सॉ मिल मालक) यांनी पकडला होता.
वनपाल वैशाली गायकवाड यांनी ट्रक बेकायदेशीर लाकूड वाहतुकीच्या कारणावरून दिनांक १४/१०/२०२४ रोजी पकडला आणि तो श्रीकृष्ण सॉ मिल, पारोळा येथे लावून दिला होता.
यानंतर, तक्रारदार आणि त्यांच्या भावाने लोकसेविका वैशाली गायकवाड आणि वन विभागाच्या कर्मचाऱ्याला भेटून ट्रक सोडण्याची विनंती केली. तेव्हा लोकसेविकेने गाडी सोडण्याच्या मोबदल्यात सुरुवातीला रु. २,५०,०००/- ची मागणी केली, व त्यानंतर तडजोडीअंती रु. १,००,०००/- खाजगी इसम सुनील धोबी यांच्याकडे देण्यास सांगितले होते.
लाचेच्या मागणीची पडताळणी:
तक्रारदार यांनी दिनांक १०/१२/२०२४ रोजी तक्रार दिली होती. या तक्रारीवरून, पंच साक्षीदारांसमक्ष दिनांक १०/१२/२०२४ रोजी पडताळणी करण्यात आली.
या पडताळणीदरम्यान, खाजगी इसम सुनील धोबी आणि लोकसेविका श्रीमती वैशाली गायकवाड व एका वनविभागाच्या कर्मचाऱ्याने ‘बेकायदेशीर लाकूड वाहतूक’ केल्याचे कारण सांगून, सदर वाहनावर कोणतीही कायदेशीर कारवाई न करण्याच्या मोबदल्यात लाच म्हणून रु. १,००,०००/- (एक लाख रुपये) लाचेची रक्कम पंच साक्षीदारांसमक्ष मागणी केल्याचे निष्पन्न झाले.
गुन्हा दाखल:
या निष्कर्षांवरून पारोळा पोलीस ठाणे, जि. जळगाव येथे गु. रजि. नं. २६४/२०२५ नुसार भ्रष्टाचार प्रतिबंध अधिनियम १९८८ चे कलम ७, ७(अ), १२ प्रमाणे दिनांक २९/१०/२०२५ रोजी गुन्हा दाखल करण्यात आला आहे.
आरोपी:
श्रीमती वैशाली गायकवाड, पद: वनपाल (वर्ग 3), नेमणूक: वन विभाग, कार्यालय पारोळा.
श्री. सुनील धोबी, खाजगी इसम, मालक: श्रीकृष्ण सॉ मिल, पारोळा.
एक वन विभागाचा कर्मचारी, नेमणूक: वन विभाग, कार्यालय पारोळा.
ही कारवाई लाचलुचपत प्रतिबंधक विभाग/घटक नाशिक/जळगाव अंतर्गत करण्यात आली आहे.
लाचलुचपत प्रतिबंधक विभागाचे आवाहन:
भ्रष्टाचारासंबंधी काही माहिती असल्यास किंवा लाच मागणाऱ्या लोकसेवकाबद्दल तक्रार असल्यास लाचलुचपत प्रतिबंधक विभाग, महाराष्ट्र राज्य यांच्याशी संपर्क साधावा.
