मराठा समाजातील विवाह संबंध जोडण्याचा केला होता संकल्प
वावडदा/जळगाव(प्रतीनिधी)- येथील रहिवासी असलेले गौरी उद्योग समूहाचे चेअरमन सुमित पाटील हे मराठा समाज सेवक म्हणून ओळखले जातात.स्वतःचा प्रपंच सांभाळत, कुणबी व मराठा समाजातील विवाह संबंध निशुल्क जुळावे, विवाह योग्य तरुण तरुणींच्या आईवडिलांचा विवाह जुळवण्यासाठीचा त्रास कमी व्हावा व पायपीट थांबावी यासाठी सुमित पाटील व त्यांची मित्रमंडळी सतत अविरत कार्य करीत असतात.या कार्याचाच भाग म्हणून १९ फेब्रुवारी शिवजयंती निमित्त किमान एक तरी विवाह जुळवून आणू असा सुमित पाटील यांनी संकल्प केला होता व असे म्हणतात निस्वार्थ भावनेने व मनापासून केलेले काम नेहमी सिद्धीस जाते त्याप्रमाणे शिवजयंती ला एक नाही, दोन नाही तर तब्बल आठ विवाह संबंध सुमित पाटील व त्यांचे सहकारी मराठा सेवकांनी जुळून आणली. सुमित पाटील व त्यांच्या सहकाऱ्यांनी गेल्या तीन वर्षात केवळ सामाजिक भावनेतून आपल्या समाजाची सेवा व्हावी या उद्देशाने तब्बल ४५०० संबंध निशुल्क जुळले आहेत. खान्देशातील मराठा समाज नोकरी कार्यनिमित्त संपूर्ण महाराष्ट्रभर व महाराष्ट्राच्या बाहेर देखील स्थायिक झाला आहे यातच विवाह जुळवणे म्हणजे मोठे जिकरीचे झाले आहे व यात मोठा खर्च हि होत असतो. मराठा समाजातील नागरिकांचा हा त्रास कमी व्हावा यासाठी सुमित पाटील व त्यांचे सहकारी कोणत्याही प्रकारची फी न घेता, खर्च न घेता निशुल्क विवाह संबंध जुळवण्याचे कार्य करीत आहेत. लोकांचे आशीर्वाद व प्रेम असेच राहिल्यास भविष्यात देखील समाजासाठी हे कार्य अविरत सुरु ठेवण्याचे सुमित पाटील यांनी सांगितले
