जळगांव(प्रतिनिधी)- जिल्हा पोलीस अधीक्षक डॉ. प्रविण मुंढे, अपर पोलीस अधीक्षक चंद्रकांत गवळी यांनी मागील काही दिवसांपासून शहरात गावठी कट्टयाने दहशत माजवणाऱ्या आरोपीचा शोध घेण्याचे स्थानिक गुन्हे शाखेचे पोलीस निरीक्षक किरणकुमार बकाले यांना आदेश दिले होते.
स्थानिक गुन्हे शाखेने आरोपीचा शोध घेत आज मिळालेल्या गुप्त माहितीद्वारे शहरातील मोहाडी रोड परीसरात सार्वजनिक ठिकाणी एक इसम त्याच्याजवळ असलेल्या गावठी कट्टयाने दहशत माजवत असल्याची माहीती मिळाली.
यावेळी स्थानिक गुन्हे शाखेचे स.फौ. अशोक महाजन, पो.हे.कॉ. लक्ष्मण पाटील, पो.ना किशोर राठोड, पो.ना रणजित जाधव, पो.ना श्रीकृष्ण देशमुख, पो.कॉ विनोद पाटील, पो.कॉ ईश्वर पाटील यांच्या पथकाने घटनास्थळी जाऊन विक्की महेंद्र कोळी वय – 20 रा.समता नगर जळगाव यास ताब्यात घेतले. त्याची अंगझडती घेतली असता त्याच्या कमरेला खोचलेला वीस हजार रुपये किमतीचा गावठी कट्टा मिळाला. आरोपीची वैदयकीय तपासणी व मुद्देमालाचा पंचनामा करुन पुढील कारवाई साठी एम.आय.डी.सी पोलीस स्टेशनच्या ताब्यात दिले.
