पुणे – शिवाजीनगर कोर्टात लाच घेताना अटक करण्यात आलेल्या कनिष्ठ लिपिकाला कोर्टाने एक दिवसाची पोलिस कोठडी सुनावली. विशेष न्यायाधीश आर. एम. पांडे यांच्या कोर्टाने हा आदेश दिला. या लिपिकाने पुरावा नष्ट करण्याच्या हेतूने गोंधळ घालत नोटा तोंडात घातल्याचा प्रकार कारवाईदरम्यान घडला होता. पंचाने नाक दाबून तोंडात बोटे घालून तेथे उपस्थित असलेल्यांसमोर नोटा बाहेर काढल्या होत्या. प्रसन्नकुमार गणपतराव भागवत (वय ५०, रा. लक्ष्मीनगर, पर्वती) असे त्याचे नाव आहे. याप्रकरणी बिबवेवाडी येथील ३१ वर्षीय व्यक्तीने तक्रार दिली आहे. तक्रारदारांच्या भावाने पोलिसांकडे फिर्याद दिली आहे. त्याचा तपास करून पोलिसांनी न्यायालयात दोषारोपपत्र दाखल केले आहे. त्याची प्रत देण्यासाठी लाच मागण्यात आली. या प्रकरणी तक्रारदाराने तक्रार दिल्यानंतर लाचलुचपत प्रतिबंधक विभागाने ही कारवाई केली. लिपिक भागवतला शुक्रवारी कोर्टासमोर हजर करण्यात आले. त्याच्याकडे अधिक तपास करण्यासाठी पोलिस कोठडी देण्याची मागणी सरकारी वकील प्रेमकुमार अगरवाल यांनी केली. बचाव पक्षातर्फे अॅड. शाहिद अख्तर, अॅड. पल्लवी वाव्हळ, अॅड. विवेक भरगुडे, अॅड. कुमार पागयुडे यांनी काम पाहिले.
