फेरफार नोंद दुरुस्तीचे काम करून देण्यासाठी मागितली होती लाच; जळगाव लाचलुचपत प्रतिबंधक विभागाची यशस्वी कारवाई
जळगाव – (प्रतिनिधी) – जिल्ह्यातील भूमी अभिलेख कार्यालयातील भूसुरमापक जितेंद्र प्रकाश पाटील (वय ४५) याला १५ हजार रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहाथ अटक केली आहे. ही कारवाई १ जुलै २०२६ रोजी करण्यात आली.
तक्रारदाराच्या वडिलोपार्जित घराच्या फेरफार नोंदीत दुरुस्ती करण्यासाठी जिल्हा अधीक्षक, भूमी अभिलेख कार्यालयाने आदेश दिले होते. मात्र संबंधित काम प्रलंबित ठेवून ते पूर्ण करून देण्यासाठी आरोपीने आपल्या वरिष्ठ अधिकाऱ्यांसाठी १० हजार रुपये आणि स्वतःसाठी ५ हजार रुपये, अशी एकूण १५ हजार रुपयांची लाच मागितली होती.
तक्रारदाराने याबाबत जळगाव एसीबीकडे तक्रार दाखल केली. तक्रारीची पडताळणी केल्यानंतर एसीबीने सापळा रचला. आरोपी जितेंद्र पाटील याने तक्रारदाराकडून १५ हजार रुपयांची लाच स्वीकारताच एसीबीच्या पथकाने त्याला रंगेहाथ पकडले.
या प्रकरणी जिल्हापेठ पोलीस ठाण्यात भ्रष्टाचार प्रतिबंधक अधिनियम, १९८८ अंतर्गत गुन्हा दाखल करण्याची प्रक्रिया सुरू आहे. ही कारवाई पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक रेश्मा अवतारे यांनी पथकासह यशस्वीरीत्या पार पाडली.
