या गाण्याचा व्हिडीओ सध्या सोशल मीडियावर जोरात व्हायरल होत आहे.
मुंबई(प्रतिनिधी)- कोणाचं नशीब कधी आणि कसं पालटेल याचं काही सांगता येत नाही. काही दिवसांपूर्वी एका रेल्वे स्टेशनवर लता मंगेशकर यांचं ‘एक प्यार का नगमा हैं’ गाणं गात भीक मागणाऱ्या एका महिलेचा व्हिडीओ सोशल मीडियवर व्हायरल झाला होता. त्यानंतर काही दिवसातच या महिलेचं आयुष्य एवढं बदललं की आता या महिलेला बॉलिवूडसाठी गाण्याच्या ऑफर येऊ लागल्या आहेत. एका माणसानं त्याच्या फेसबुक अकाउंटवर या महिलेचा व्हिडीओ पोस्ट केला होता. जो खूप व्हायरल झाला आणि ही महिला रातोरात स्टार झाली. या महिलेचं नाव होतं रानू मांडल. त्यानंतर तिचा मेकओव्हरही करण्यात आला.
गायक हिमेश रेशमियानं त्याच्या आगामी सिनेमातील गाणं राणू मांडलला ऑफर केलं आहे. नुकताच हिमेशनं तिच्या गाण्याचा हा व्हिडीओ त्याच्या सोशल मीडिया अकाउंटवर शेअर केला आहे. या व्हिडीओमध्ये रानू तिच्या जादुई आवाजात नवीन गाणं गाताना दिसत आहे. तिच्या बाजूलाच हिमेश तिचं गाणं ऐकत उभा असलेला पाहायला मिळत आहे. हिमेशनं या गाण्याचा व्हिडीओ शेअर करताना लिहिलं, ‘तेरी मेरी कहानी’ हे गाणं माझा आगामी सिनेमा ‘हॅप्पी हार्डी और हीर’ यातील असून हे गाणं राणूनं गायलं आहे.’राणू काही दिवसांपूर्वी एका रेल्वे स्टेशनजवळ प्रसिद्ध गायिका लता मंगेशकर यांचं गाणं ‘एक प्यार का नगमा हैं’ गाताना दिसली होती. एका व्यक्तीनं तिचा गातानाचा व्हिडीओ सोशल मीडियावर शेअर केला होता. ही व्हिडीओ सोशल मीडियावर खूप व्हायरल झाला आणि राणू रातोरात स्टार झाली. या एका व्हिडीओनं तिचं अवघं आयुष्यच बदलून टाकलं. राणूला आतापर्यंत अनेक ऑफर्स मिळाल्या आहेत. मात्र तिच्यासाठी तिच्या मुलीशी झालेली भेट हे सर्वात मोठं गिफ्ट होतं. व्हिडीओ व्हायरल झाल्यानंतर १०वर्षांपासून आपल्या मुलीपासून दूर गेलेल्या राणूला तिची मुलगी परत मिळाली.
