लोहारा येथे वीज कोसळली!! सुदैवाने जीवितहानी टळली

लोहारा – (ईश्वर खरे) – येथील सामाजिक कार्यकर्ते भगवान यशवंत खरे यांच्या शेतातील “कडु लिंबाच्या झाडावर आज वीज कोसळली” सविस्तर वृत्त असे की आज दि.11 रोजी दुपारच्या ४ वाजेच्या सुमारास परतीच्या पावसाने सोसाट्याच्या वाऱ्यासह विजांचा कडकडाट सुरू होता.तेथील पाचोरा रोडवर असणाऱ्या इंडियन ऑइल पेट्रोल पंपाच्या लगतच असलेल्या लोहारा-पाचोरा रस्त्यावर भगवान खरे यांच्या शेतात( गट नंबर २७) मध्ये
अति तीव्रतेत वीज चमकली व मोठ्याने आवाज झाला.

आणि कडाडणारी वीज लिंबाच्या झाडावर जाऊन कोसळली. सुदैवाने कोणतीही जिवीत हानी झाली नाही. लोहारा पाचोरा रस्ता नेहमी वर्दळीचा रस्ता आहे. तसेच भगवान खरे यांच्या आई रुखमाबाई व पत्नी वत्सलाबाई या नुकत्याच पावसाचे वातावरण बघून घराकडे परतल्या आणि तितक्याच वीज कोसळली, विजेची तीव्रता इतकी होती की १ किलोमीटर पर्यंतचा परीसर प्रकाशाने लख लखला या विजेने लिंबाच्या झाडाच्या सालीचे तुकडे तुकडे झाले. जवळच असलेल्या पेट्रोल पंपावर पावसाच्या आश्रयाने उभे असलेली माणसे भयभीत झाली.
सदरील शेतकरी भगवान खरे व सुनिल खरे यांनी क्षेत्राच्या महसुल विभागातर्फे पंचनामा करून बाधित झालेल्या कपाशी पिकाची नुकसान भरपाई मिळावी याची मागणी करीत आहे.