पुणे– पालकमंत्री चंद्रकांत पाटील यांनी शुक्रवारी दिवसभरात विविध कार्यक्रम-बैठकांना हजर राहून जनसंपर्काचा धडाका लावला. मात्र, या कार्यक्रमांना माजी पालकमंत्री तथा खासदार गिरीश बापट यांच्या समर्थकांनी पाठ फिरवल्याचे चित्र दिसले. त्यामुळे येत्या काळात पुणे शहरात ‘दादा विरुद्ध भाऊ’ अशी नवी समीकरणे आकार घेत असल्याची चर्चा पक्षात सुरू झाली आहे.
पालकमंत्री पाटील यांनी शुक्रवारी दिवसभर पुण्यात विविध कार्यक्रम घेतले. ‘पीएमआरडीए’च्या कार्यालयात बैठक, प्राधिकरणातील समस्यांचा आढावा, पुणे विद्यापीठ, विभागीय आयुक्त कार्यालयात अधिकाऱ्यांची बैठक, जिल्हा परिषदेमध्ये आढावा, जिल्हाधिकारी कार्यालय येथे बैठक तसेच महापौर बंगला येथे नागरिकांशी संवाद साधून त्यांच्या अडीअडचणी त्यांनी जाणून घेतल्या.
या दौऱ्यामध्ये बापट समर्थक कार्यकर्ते तसेच नगरसेवकांनी पाटील यांच्या दौऱ्यापासून दूर राहणे पसंत केल्याचे दिसून आले. महापौर बंगला येथे झालेल्या गाठीभेटीच्या कार्यक्रमात महापौर मुक्ता टिळक, सभागृह नेते श्रीनाथ भिमाले यांच्यासह मोजके कार्यकर्ते, नगरसेवक उपस्थित होते. शहराध्यक्ष योगेश गोगावले यांची उपस्थिती तसेच त्यांच्या समर्थकांची संख्या लक्षणीय होती. आमदार भीमराव तापकीर आणि विजय काळे उपस्थित होते. शहर आणि जिल्ह्यातून पाटील यांना भेटण्यासाठी आलेल्या कार्यकर्ते आणि नागरिकांची संख्या लक्षणीय होती.
शेडेकर कुटुंबीयांची भेट
आमदार नीतेश राणे आणि त्यांच्या समर्थकांनी कणकवली येथे सार्वजनिक बांधकाम विभागातील उपअभियंता प्रकाश शेडेकर यांच्यावर चिखलफेक केली. शेडेकर यांचे कुटुंबीय पुण्यात कात्रज परिसरात राहतात. पालकमंत्री पाटील यांनी या कुटुंबीयांची भेट घेऊन कर्तव्यदक्ष अधिकाऱ्यांच्या पाठीशी सरकार ठामपणे उभे आहे, असे आश्वासन दिले. ‘माझ्या मुलाचा काय दोष, त्याच्या प्रामाणिकपणाची त्याला ही शिक्षा आहे का?’ असा प्रश्न शेडेकर यांच्या आईने पाटील यांच्यासमोर उपस्थित केला.