<
मुलुंड : शेखर चंद्रकांत भोसले
कोरोनाच्या वाढत्या धकाधकीतही, मुंबई पोलिस दल आपल्या जीवाची पर्वा न करता मुंबईकरांचे रक्षण करत आहेत. नागरिकांना कोरोनाचा संसर्ग होवू नये तसेच नागरिकांमार्फत शासनाने दिलेल्या आदेशाचे पालन व्हावे यासाठी रस्त्यावर, नाक्यावर, गल्लीत जागता पहारा देत आहेत. मुंबई पोलिस दलातील अनेक अधिकाऱ्यांना व पोलिसांना कोरोनाची बाधा झाली आहे तर काहींचा मृत्यू झाला आहे परंतु तरीही न डगमगता मुंबई पोलिस दल सामान्य नागरिकांसाठी रस्त्यावर आपले कर्तव्य बजावित आहे. यामुळेच मुंबई पोलिस दलाच्या प्रति कृतज्ञता व्यक्त करण्यासाठी मुलुंड पश्चिमेला स्टेशन समोरील रस्त्यावर एक छानसे चित्र काढण्यात आले आहे. श्री समर्थ स्वामी सामाजिक संस्थेचे अध्यक्ष संजय माळी यांच्या सौजन्याने, रूपेश पांचाळ या चित्रकाराने अक्षय गोरिवले आणि रितेश म्हसकर या कलाकार मित्रांच्या साथीने मुंबई पोलिसांच्या कार्याचा गौरव करण्यासाठी हे चित्र स्टेशनसमोरील रस्त्यावर काढले आहे. फेसबुक व व्हाट्सअपवर हे पेंटिंग वायरल झाल्याने मुलुंड मधील अनेक नागरिक हे चित्र बघण्यासाठी येत आहेत व कलाकारांना दाद देत मुंबई पोलिसांना सलाम ठोकत आहेत.
