जळगाव, दि. 8 (जिमाका वृत्तसेवा) : नानाजी देशमुख कृषी संजीवनी प्रकल्पांतर्गत (पोक्रा) कृषी व्यवसाय करण्यासाठी संपर्क साधावा, असे आवाहन जिल्हा अधीक्षक कृषी अधिकारी तथा प्रकल्प संचालक संभाजी ठाकूर यांनी केले आहे.
राज्यातील 15 जिल्ह्यांत राबविण्यात येणाऱ्या नानाजी देशमुख संजीवनी प्रकल्पांतर्गत कृषी व्यवसाय करू इच्छिणाऱ्या प्रकल्प क्षेत्रातील नोंदणीकृत शेतकरी गट, महिला गट तसेच इतर गट व जिल्ह्यातील शेतकरी उत्पादक कंपनी यांच्याकरीता कृषी व्यवसाय या घटकांतर्गत भाडे तत्वावर कृषी औजारे सेवा केंद्र, धान्य साठवणूक गोडावून, शेतमाल प्रक्रिया केंद्र, बीज प्रक्रिया केंद्र, दालमिल, फळ पिकवणी केंद्र, कृषी उत्पादनांचे वर्गीकरण व प्रतवारी केंद्र, मुरघास तयार करणे व इतर कृषी आधारित व्यवसाय इत्यादी बाबींकरीता अर्ज व प्रस्ताव सादर करू शकतात.
या घटकांतर्गत मंजूर कृषी व्यवसाय प्रस्तावांना 60 टक्के अनुदान देय असून प्रकल्प क्षेत्रातील नोंदणीकृत शेतकरी गट, महिला गट तसेच इतर गट व जिल्ह्यातील शेतकरी उत्पादक कंपनी यांनी या संधीचा लाभ घ्यावा. अधिक माहितीसाठी जिल्हास्तरावर चंदन मुळे, प्रकल्प विशेषज्ञ, कृषी व्यवसाय, उपविभागीय कृषी अधिकारी किंवा तालुका कृषी अधिकारी कार्यालयाशी संपर्क साधावा, असे आवाहन जिल्हा अधीक्षक कृषी अधिकारी श्री. ठाकूर यांनी केले आहे.
