<
महत्वाचे- रेडक्रॉस भवन येथील लसीकरण केंद्र हे सोमवार दिनांक- २९ मार्च रोजी सुरु असणार आहे.
जळगाव – सामान्य रुग्णालय, शासकीय वैद्यकीय महाविद्यालय जळगाव, जळगाव शहर महानगरपालिका आणि इंडियन रेडक्रॉस सोसायटी जळगाव यांच्या संयुक्त विद्यमाने कोविड -१९ अॅन्टीजन तपासणी केद्र सुरु करण्यात आले. या तपासणी केंद्राच्या उद्घाटन प्रसंगी जिल्हा सामान्य रुग्णालयाचे शल्य चिकित्सक डॉ. नागोजीराव चव्हाण, शासकीय वैद्यकीय महाविद्यालयाचे अधिष्ठाता डॉ. जयप्रकाश रामानंद, जळगाव शहर महानगरपालिकेचे आयुक्त श्री. सतीश कुलकर्णी, नवनिर्वाचित महापौर सौ, जयश्रीताई महाजन, रेडक्रॉसचे उपाध्यक्ष श्री. गनी मेमन, मानद सचिव श्री. विनोद बियाणी, डॉ प्रसन्नकुमार रेदासनी – रक्तपेढी चेअरमन, जनसंपर्क अधिकारी सौ. उज्वला वर्मा उपस्थित होते. संपूर्ण कोरोना काळात रेडक्रॉसने सामाजिक भावनेतून अतिशय उत्कृष्ठ सेवा दिली असून अजूनही सर्व पदाधिकारी व कर्मचारी सेवा देत आहेत अशा शब्दात मनपा आयुक्त श्री. सतीश कुलकर्णी यांनी रेडक्रॉसचे कौतुक करत आभार व्यक्त केले.
हे तपासणी केंद्र शहराच्या मध्यभागी म्हणजेच महानगरपालिका संचलित सानेगुरुजी वाचनालयातील टेबल टेनिस हाॅल,शासकीय रुग्णालयाच्या मागे सुरु झाले असून तपासणी पूर्णपणे विनामूल्य आहे. सद्य परिस्थितीत शासकीय यंत्रणेवर खूप मोठ्या प्रमाणात ताण पडत आहे आणि रुग्णांची तपासणी लवकर झाल्यास उपचार लवकर करणे शक्य होईल. या सर्व बाबींचा विचार करून माननीय जिल्हाधिकारी श्री. अभिजीत राउत यांच्या मार्गदर्शनाने आणि माननीय जिल्हा शल्य चिकित्सक यांच्या सहकार्याने या केंद्रात सकाळी ९ ते सायंकाळी ५ वाजेपर्यंत सेवा देण्यात येत आहे. तसेच रविवारी देखील हि सेवा नागरिकांसाठी सुरु राहणार आहे. या तपासणी केंद्राचा नागरिकांनी लाभ घ्यावा असे आवाहन माननीय जिल्हाधिकारी श्री. अभिजित राउत यांनी केले आहे.
