<
जळगाव, (जिमाका) दि. ७ – सद्यस्थितीत राज्यात कोरोना विषाणूचा प्रादुर्भाव मोठ्या प्रमाणावर वाढत आहे. राज्य शासनाच्या निर्देशाप्रमाणे कोरोना विषाणूचा प्रादुर्भाव रोखण्यासाठी मुद्रांक विभागाने नागरीकांच्या सुरक्षितेतेच्यादृष्टिने व दस्त नोंदणीच्या सोईसाठी विभागात काही सेवा ऑनलाईन उपलब्ध करुन दिल्या असून या सेवांचा नागरीकांनी लाभ घ्यावा. असे आवाहन सुनील पाटील, सह जिल्हा निबंधक वर्ग- 2, जळगाव तथा प्रशासकीय अधिकारी, जळगाव यांनी केले आहे.
दुय्यम निबंधक कार्यालयात होणारी गर्दी कमी करण्याच्या उद्देशाने सेवा व सुविधांचा वापर करण्याचे अनिवार्य केले असून त्याचा वापर करून दस्त नोंदणी बाबत शासनास सहकार्य करावे. नागरिकांनी विभागाच्या igrmaharashtra.gov.in या संकेतस्थळावर असलेल्या दस्त नोंदणी करीता PDE डेटा एंट्री करणे अनिवार्य करण्यात आलेले आहे. यापुढे दुय्यम निबंधक कार्यालयातील डेटा एंट्री किंवा दुरुस्त्या पुर्णपणे थांबविण्यात येत आहेत.
नागरिकांनी सदर PDE डेटा एंट्री करून दस्त नोंदणीसाठी या विभागाच्या वेबसाईट वर estep-in या प्रणालीद्वारे दुय्यम निबंधक कार्यालयातील उपलब्ध असलेली सोईची वेळ ऑनलाईन आगाऊ बुक करून किंवा कार्यालयीन दुरध्वनीवर/समक्ष संपर्क साधून वेळ आरक्षित करणे अनिवार्य करण्यात आले आहे. कोणत्याही परिस्थीतीत आगाऊ वेळ आरक्षीत केली नसल्यास (walking) दस्त नोंदणी होणार नाही याची कृपया नोंद घ्यावी.
कोरोनाच्या प्रसारावर प्रतिबंधात्मक उपाय म्हणून शासनाच्या निर्देशानुसार जिल्हाधिकारी अभिजीत राऊत यांनी शासकीय कार्यालयात अभ्यागतांना 30 एप्रिल, 2021 पर्यंत प्रवेशास मनाई केलेली असल्याने नागरीकांनी प्रत्यक्ष कार्यालयात न येता दस्ताचे निष्पादन घरी किंवा कार्यालयाच्या बाहेरच करावे व प्रत्येक व्यक्तीने सह्यांसाठी स्वत:चे पेन आणणे, एकच पेन एकमेकांत सह्यांसाठी वापरू नये, आरक्षित वेळेलाच कार्यालयात हजर रहावे, मास्क लावल्याशिवाय कोणत्याही व्यक्तीला कार्यालयात प्रवेश दिला जाणार नाही याची नोंद घ्यावी.
विभागाच्या वेबसाईट वर लिव्ह अँड लायसन ई-रजिस्ट्रेशन प्रणालीचा पर्याय उपलब्ध असल्याने लिव्ह ॲड लायसन दस्ताची कार्यालयातील नोंदणी (फिजीकल रजिस्ट्रेशन) पुढील आदेशापर्यंत थांबविण्यात आल्याचेही श्री. पाटील यांनी कळविले आहे.
