<
प्रतिनिधी परभणी : जिंतूर नगर परिषदेच्या एका अधिकाऱ्याला राष्ट्रवादी काँग्रेसचे आमदार विजय भांबळे यांनी घरी बोलवून मारहाण केली. ही घटना ५ जुलै रोजी सायंकाळी घडली. या प्रकणी जिंतूर पोलिसात रात्री उशिरा पर्यंत आमदार भांबळे विरोधात गुन्हा दाखल करण्यात आला. त्या अधिकाऱ्यावर ही अॅट्रासिटीचा चा गुन्हा दाखल झाला. दरम्यान, यामुळे जिल्ह्यातील राजकीय वर्तुळात पुन्हा एकदा चर्चेला उधाण आल्याचे दिसून येत आहे.
जिंतूर पालिकेतील कर वसुली अधिकारी दत्तराव विश्वनाथ तळेकर यांनी दिलेल्या तक्रारीत आमदार भांबळे यांनी त्यांना घरी बोलावून घेतले होते. त्यांनी सांगितलेले काम तू का केले नाही, ते करण्यासाठी दबाव आणला. परंतु, या दबावाला नकार दिल्यानंतर आमदार भांबळे यांनी मारहाण केल्याचे म्हटले आहे. तर याच वेळी दत्ता तळेकर यांच्या विरोधात देखील एकाने फिर्याद देऊन अॅट्रासिटीचा गुन्हा दाखल केला.
दरम्यान, आमदार भांबळे यांनी या पूर्वीही अनेक अधिकारी आणि कर्मचाऱ्यांचा समाचार घेतला आहे. या घटनेचे जिंतूर तालुक्यात तीव्र पडसाद उमटले. आजच्या या घटनेने पूर्ण जिल्ह्यत खळबळ उडाली असून, पोलिस ठाण्यात तळेकर यांच्या विरोधात गुन्हा नोंदविण्यात आल्याने कर्मचारी वर्गात भीतीचे वातावरण निर्माण झाले आहे. विशेष म्हणजे आगामी विधानसभा निवडणुकीच्या तोंडावर हे प्रकरण घडल्याने विरोधी पक्षातील नेत्यांनी या प्रकरणत लक्ष घातले आहे. त्यामुळे पोलिस प्रशासनावर मोठा दबाव आल्याची चर्चा जोर धरून आहे. जिंतूर येथे नव्यानेच रुजू झालेले पोलिस निरीक्षक उमेश पाटील यांची हे प्रकरण हताळताना चांगलीच तारांबळ उडणार.
