दुकान फोडून ६० हजाराचा मुद्देमाल लंपास
सात दिवसात सहा घरफोड्या झाल्याने ग्रामस्थांमध्ये घबराहाट
अमळनेर : टॅमिने दुकानाचे कुलूप तोडून दुकानातील रोख रक्कम व किराणा मालासह साठ हजाराचा माल अज्ञात चोरट्याने लंपास केल्याची घटना १५ रोजी रात्री चौबारी येथे घडली. सहा दिवसांपूर्वी चौबारी येथे आठ घरे फोडण्यात आली होती त्यामुळे ग्रामस्थांमध्ये भीतीचे वातावरण पसरले आहे.
संजय भागचंद जैन यांचे चौबारीत संजय किराणा दुकान असून १५ रोजी रात्री ९ ते १६ रोजी पहाटे ७ वाजेदरम्यान अज्ञात चोरट्याने दुकानाच्या शटरचे कुलूप तोडून दुकानातील ३५ हजार रुपये रोख व २५ हजाराचा तेल ,साखर ,साबण असा किराणा माल एकूण साठ हजाराचा माल चोरून नेला आहे. घटनेचे वृत्त कळताच सहाययक पोलीस निरीक्षक जयेश खलाणे ,पोलीस उपनिरीक्षक वैभव पेठकर , हेडकॉन्स्टेबल भास्कर चव्हाण ,सचिन चव्हाण सुनील आगवणे, फिरोज बागवान यांनी भेट देऊन पंचनामा केला. श्वान पथक तसेच अंगुली मुद्रा पथक मागवण्यात आले होते. पोलिसांना दोन जणांवर संशय असून त्यांना चौकशीसाठी बोलावण्यात येणार आहे. मारवड पोलीस स्टेशनला घरफोडीचा गुन्हा दाखल करण्यात आला असून तपास भास्कर चव्हाण करीत आहेत.
सहा दिवसांपूर्वी झालेल्या घरफ़ोड्यांचा सुगावा अद्याप लागलेला नाही. त्यामुळे ग्रामस्थांमध्ये भीती निर्माण झाली आहे.
