गुलाबराव देवकर व सुरेश जैन यांच्यासह सर्व सहकारी दोषीचंं
जळगाव – राज्यभर गाजलेला जळगाव नगरपालिकेतील घरकुल घोटाळ्यात ४८ जणांना दोषी ठरवण्यात आले आहे. धुळे जिल्हा न्यायालयाने दोषी ठरवलेल्यांमध्ये माजी मंत्री सुरेश जैन, राष्ट्रवादी काँग्रेसचे नेते आणि माजी मंत्री गुलाबराव देवकर यांच्यासह सर्वच आरोपींना दोषी ठरवलं आहे. सोबतच सर्व संशयितांना ताब्यात घेण्याचे आदेश न्यायालयाने दिले आहेत.
आज सुनावणी दरम्यान विशेष सरकारी वकील प्रवीण चव्हाण यांनी कोर्टात म्हंटले कि, घरकुल घोटाळ्यामुळे जळगाव महापालिकेवर कोट्यवधींचे कर्ज झाले आहे. हा गंभीर स्वरुपाचा गुन्हा असून त्या जळगाव शहर, जिल्हा, राज्य आणि राष्ट्रावर परिणाम झाला आहे. त्यामुळे सर्व दोषींना जन्मठेपेची शिक्षा द्यावी, अशी मागणी त्यांनी यावेळी केली. निकालाच्या वेळी धुळे न्यायालयात मोठी गर्दी झाली. तसेच कुठलाही अनुचित प्रकार टाळण्यासाठी मोठा पोलिस बंदोबस्त देखील लावण्यात आला होता.
नेमके काय आहे प्रकरण?
जळगाव नगरपालिकेतील सत्ताधारी गटाने झोपडपट्टी निर्मूलनाच्या उद्देशाने स्वस्त दरात चांगली घरे देण्यासाठी घरकुल योजना राबवण्याचे ठरवले होते. घरकुल बांधण्यासाठी “हुडको” कडून कोट्यवधींचं कर्ज घेण्यात आलं होते. हरी विठ्ठलनगर, खंडेरावनगर, समतानगर आणि तांबापुरा याठिकाणी कर्ज काढून ११ हजार घरे बांधण्याच्या कामास १९९९ मध्ये सुरुवात झाली. सुरुवातीपासूनच अनियमितता, कायद्याचे उल्लंघन, मनमानी पद्धतीने निर्णय, गैरव्यवहार या सर्वांचा ससेमिरा मागे लागला. सत्ताधाऱ्यांनी मर्जीतील खान्देश बिल्डर्सला हे काम दिलं. नियमबाह्य पद्धतीने ठेकेदाराला सुमारे २६ कोटी रुपये बिनव्याजी आगाऊ देण्यात आले. इतकेच नव्हे, तर ठेकेदारास विविध सुविधाही देण्यात आल्या होत्या. हा सगळा प्रकार २००१ मध्ये समोर आला होता.
