जिल्हा कारागृह आहे की;हाणामारी गृह?

जळगाव कारागृहात कैद्याने केला दुसऱ्यावर प्राणघातक हल्ला ; कारागृह सुरक्षेचा प्रश्न ऐरणीवर

जळगाव -(प्रतिनिधी)-जळगाव कारागृहात आज शुक्रवारी सकाळी आणखी एका कैद्यावर दुसऱ्या कैद्यावर प्राण घातक हल्ला केला. सचिन दशरथ सैदाणे (वय ३०) असे हल्ला करणाऱ्या कैद्याचे नाव आहे. याच कैद्याने मंगळवारी (दि.३) उप तुरुंग अधिकाऱ्यासही लोखंडाची पट्टी मारून जखमी केले होते. चार दिवसात एका कैद्याने दोन जणांना जखमी केल्याच्या घटना घडल्याने कारागृहात खळबळ उडाली आहे.

सचिन सैदाणे हा गेल्या ३०-१०-२०१६ पासून न्यायालयीन कोठडीत आहे. त्याने गेल्या सोमवारी सायंकाळी सहकैदी महेश उर्फ डेम्या वासुदेव पाटील याच्याकडे पाच हजार रुपयांची मागणी केली होती. मात्र त्याने नकार दिल्याने दोघांमध्ये मंगळवारी सकाळी वाद झाला. त्यांचे भांडण सोडवण्यासाठी गेलेले उप तुरुंग अधिकारी किरण पवार यांना सचिनने लोखंडी पट्टी मारून जखमी केले होते. या प्रकरणाचा अहवाल वरिष्ठांकडे पाठवला असतानाच आज सकाळी ६.३० च्या सुमारास सचिन सैंदाणे याने दुसरा सहकैदी शुभम देशमुख हा ब्रश करीत असताना त्याच्या पाठीवर पत्र्यासारख्या वस्तूने वार करून त्याला जखमी केले. जखमी शुभमवर कारागृहातच उपचार करण्यात आले असून या प्रकरणी लवकरच अहवाल पाठवणार असल्याची माहिती मिळाली आहे.