<
मुंबई – (हर्षल भोईर) – बृहन्मुंबई महानगरपालिकेच्या माध्यमातून सुरू असलेल्या भिवंडी तालुक्यातील प्रकल्पग्रस्तांसाठी बांधलेली मराठी शाळा पालिकेच्या जलअभियंता ने धोकादायक ठरवून जमीनदोस्त केली. परंतु विद्यार्थ्यांना पर्यायी शाळेची व्यवस्था न करता त्यांच्या शिक्षणाचे तीन तेरा बीएमसी प्रशासनाने वाजवले आहेत. एकीकडे महाराष्ट्र सरकारचे मुख्यमंत्री मा.उद्धव ठाकरे साहेब हे मराठी भाषेचे जतन व संवर्धन करण्याहेतू अभिजात भाषेचा दर्जा मिळावा यासाठी प्रयत्न करीत असताना त्याच ठाकरे सरकारच्या मुंबई महानगरपालिकेने मराठी शाळा बंद करण्याचा जणू चंगच बांधलेला दिसत आहे.
मराठी भाषा दिनाच्या पूर्वसंध्येलाच मराठी शाळेतील विद्यार्थी हे मंदिराच्या व पडक्या इमारतीच्या आवारात तसेच पटांगणातील झाडाखाली शिक्षण घेत असल्याचे भिवंडी तालुक्यातील धामणगाव ह्या प्रकल्पग्रस्तांसाठी बांधलेल्या मनपाच्या शाळेत दिसून येत आहे. बृहन्मुंबई महानगरपालिकेच्या वतीने पिसे पांजरापुर येथील गोडाऊन शाळेसाठी पर्यायी व्यवस्था म्हणून देण्यात आली होती. परंतु त्या गोडाऊनला लागूनच पालिकेचा डिझेल पंप व ऑइल प्लांट असल्याने विद्यार्थ्यांसाठी सदरील जागा अतिधोकादायक होती म्हणून ह्या पर्यायी व्यवस्थेला पालकांनी तीव्र विरोध दर्शवला होता. पालिकेने शाळेला दिलेली पर्यायी जागा आधीच्या शाळेपासून ६ किमी लांब अंतरावर असल्याने विद्यार्थी पालकांना मोठा आर्थिक भुर्दंड बसू शकतो. ह्या शाळेत शिकणारे बहुसंख्य विद्यार्थी हे आदिवासी असल्याने त्यांच्या पालकांना हे परवडण्याजोगे नाही.
संबंधित विषयाची तक्रार मनसेकडे येताच क्षणी मनविसे तालुका अध्यक्ष परेश चौधरी विभाग अध्यक्ष ऍड सुनील देवरे, पिके पाटील, भावेश पाटील यांनी शाळेची भेट घेत विद्यार्थी पालकांच्या वतीने कार्यकारी अभियंता यांना पत्र देत विद्यार्थ्यांना सुरक्षित ठिकाणी हलविण्यात यावे व त्यांच्यासाठी शाळेसाठी पर्यायी व्यवस्था जवळपास करण्यात यावी अशी मागणी केली.
तसेच येत्या १० दिवसात ह्या विद्यार्थ्यांच्या पर्यायी शाळेची व्यवस्था करण्यात यावी अन्यथा महाराष्ट्र नवनिर्माण विद्यार्थी सेना कार्यकारी अभियंत्यांच्या दालनात शाळा सुरू करण्यात येईल असा दमच तालुकाध्यक्ष परेश चौधरी ह्यांनी दिला.
