जळगाव – (प्रतिनिधी)
भरधाव अज्ञात वाहनाच्या धडकेने तालुक्यातील उमाळा येथे जखमी झालेल्या व्यक्तीचा उपचारादरम्यान मृत्यू झाला होता. रघुनाथ रतन शिंदे असे मयत इसमाचे नाव आहे.
मिळालेल्या माहितीनुसार, रघुनाथ रतन शिंदे (वय ४३) हे त्यांच्या कुटुंबीयांसह वास्तव्यास होते. १५ जून रोजी सकाळी ८ वाजेच्या सुमारास शिंदे हे उमाळा फाट्याजवळ उभे असताना त्यांना भरधाव वेगाने येणाऱ्या अज्ञात वाहनाने जोरदार धडक दिली होती. या अपघातात रघुनाथ शिंदे हे गंभीर जखमी झाले होते. त्यांना जिल्हा शासकीय वैद्यकीय महाविद्यालयात उपचारार्थ दाखल केले असता उपचारादरम्यान त्यांची प्राणज्योत मालवली.
या अपघाताप्रकरणी दीड महिन्यानंतर मयत रघुनाथ यांची पत्नी सुनंदा यांनी यांनी एमआयडीसी पोलीस ठाण्यात धाव घेऊन तक्रार दिली.
सुनंदा यांच्या तक्रारीवरून, शुक्रवार, २९ जुलै रोजी रात्री ९ वाजता अज्ञात कारचालकाविरोधात गुन्हा दाखल करण्यात आला असून, पुढील तपास पो.उप.नि. अनिस शेख करीत आहेत.
