<
जळगाव – (प्रतिनिधी)
आज जुने बस स्थानक व क.ब.चौ.उ.म. विद्यापीठापर्यंत सिटी बससेवा तात्काळ सुरू करण्यात येण्याच्या आशयाचे निवेदन बस विभाग नियंत्रक यांना देण्यात आले असून, यामुळे विद्यार्थी व शहरात ये-जा करणाऱ्या प्रवाशांची गैरसोय थांबणार आहे.
सदर दिलेल्या निवेदनाद्वारे जुने बसस्थानक ते विद्यापीठ या मार्गावरील सिटी बसेस व विद्‌यापीठात जाणाऱ्या व तेथून शहरात येणाऱ्या सिटी बसेस अद्याप बंद असल्यामुळे बरेच पाल्यांसह सर्वच विद्यार्थ्यांची शिक्षणाकरिता ये-जा करण्याची गैरसोय होत आहे.
सध्या कोरोनाची लाट ओसरली असून सर्व व्यवहार पूर्वपदावर आले आहेत. तरीदेखील सदर बसेस सुरू नसल्यामुळे विद्यार्थ्यांना नाईलाजास्तव रिक्षाने ये-जा करावी लागत आहे. यामुळे त्यांना दररोज ८० ते १०० रुपयांचा खर्च सोसावा लागत आहे.
हा खर्च गोरगरीब, सर्वसामान्य जनतेला परवडणार नसल्याने, हा प्रकार थांबण्यासाठी जळगाव शहरातील जुने बसस्थानक ते कवयित्री बहिणाबाई चौधरी उत्तर महाराष्ट्र विद्यापीठाच्या मुख्य इमारतीपर्यंत सिटी बसेस सुरू करावे, अश्या आशयाची मागणी माहिती अधिकार कार्यकर्ते दीपक कुमार गुप्ता यांनी जळगाव बस विभाग नियंत्रक भगवान जगनोर यांना दुपारी ३ ऑगस्ट रोजी करण्यात आली आहे.
