<
धरणगाव – (प्रतिनिधी)
चोपडा रस्त्यावरील पिंपळे गावाजवळ झालेल्या भीषण रस्ते अपघातात दोन तरुण जागीच गतप्राण झाले असून, या घटनेमुळे सर्वत्र हळहळ व्यक्त होत आहे.
मिळालेल्या माहितीनुसार, शहरातील प्रदीप पाटील (वय २३) व किशोर पाटील (वय ३१) दोघे रा. संजय नगर हे तरुण कामानिमित्त (एमएच-१९ सीएच ३८९४) या दुचाकीने चोपडा गेले होते. दुपारी चोपड्याहून परततांना पिंपळे गावाच्या फाट्यानजीक असलेल्या नायरा पेट्रोल पंपाच्या वळणावर त्यांच्या दुचाकींचा अपघात झाला.
हा रस्ते अपघात इतका जोरदार होता की, यात एकाची कवटी फुटली तर दुसऱ्याच्या पायाचे तुकडे तुकडे झाले. दोघे तरुण या अपघातात जागीच गतप्राण झाले. अपघाताची माहिती मिळताच अनेक राजकीय व सामाजिक कार्यकर्त्यांनी ग्रामीण रुग्णालयात गर्दी केली होती.
दरम्यान, याबाबत धरणगाव पोलीस ठाण्यात नोंद घेण्याचे काम सुरू होते. तरी दोघा तरुणांच्या मृत्यूमुळे सर्वत्र हळहळ व्यक्त केली जात आहे.
