इजिप्तमधील मंदिरात २ हजार मेढ्यांची मुंडकी आढळली आहेत. उत्खननादरम्यान संशोधकांना प्राण्यांचे अवशेष सापडले. यामध्ये कुत्रे, बकऱ्या, गाय, हरणांच्या मुंडक्यांचा समावेश आहे.
March 27, 2023
कैरो: इजिप्तमध्ये २ हजारांपेक्षा अधिक मेंढ्यांची मुंडकी सापडली आहेत. त्यामुळे संशोधक बुचकळ्यात पडले आहेत. इजिप्तचे राजा फिरोन रामसेस द्वितीयच्या मंदिरात मेंढ्यांची मुंडकी सापडल्याची माहिती पर्यटन आणि पुरातत्त्व मंत्रालयानं दिली. मंदिरात कुत्रे, बकऱ्या, गाय, हरणं आणि मुंगूसांच्या डोक्याचे अवशेष संशोधकांना सापडले आहेत.
दक्षिण इजिप्तमधलं एबिडोस शहर मंदिरं आणि मकबऱ्यांसाठी प्रसिद्ध आहे. न्यूयॉर्क विद्यापीठातील पुरातत्त्व तज्ज्ञांच्या एका पथकानं शहरात उत्खनन केलं. मेंढ्या आणि अन्य प्राण्यांची मुंडकी राजा फिरोन रामसेस द्वितीयला प्रसाद रुपात अर्पण करण्यात आली होती, असं संशोधकांनी सांगितलं. समीह इस्कंदर यांनी संशोधन करणाऱ्या पथकाचं नेतृत्त्व केलं
फिरोन रामसेस द्वितीयच्या मृत्यूनंतर त्यांच्या मंदिरात प्राण्यांची बळी दिले जायचे. त्यासाठी मेंढ्यांचा सर्वाधिक वापर केला जायचा. प्राचीन इजिप्तमधील जनता आपल्या राजाला प्रसाद रुपात प्राण्यांचा बळी द्यायची. दुसऱ्या रामसेसनं इसवी सन पूर्व १३०४ ते १२३७ अशी जवळपास ७० वर्षे इजिप्तवर राज्य केलं,’ असं इस्कंदर यांनी सांगितलं.
या संशोधनामुळे दुसऱ्या रामसेसचं मंदिर आणि इसवी सन पूर्व २३७४ ते २१४० या कालावधीत झालेल्या बांधकामापासून इसवी सन ३२३ ते ३० दरम्यान झालेल्या घडामोडींबद्दल लोकांना अधिक माहिती मिळेल, असं इजिप्तचे पुरातन अवशेषांच्या सर्वोच्च परिषदेचे प्रमुख मुस्तफा वजिरी म्हणाले. जनावरांच्या अवशेषांसोबतच पुरातत्त्व तज्ञांना जवळपास ४ हजार वर्षे जुन्या महालाचे अवशेष सापडले आहेत. या महालाची भिंत तब्बल ५ मीटर (१६ फूट) जाड आहे. या संशोधनादरम्यान अनेक मूर्ती, प्राचीन वृक्षांचे अवशेष, चामड्याचे कपडे आणि चपला सापडल्या आहेत.
एबिडोस शहर काहिराच्या दक्षिणेला नाईल नदीपासून ४३५ किलोमीटर अंतरावर आहे. या ठिकाणची मंदिर आणि मकबरे प्रसिद्ध आहेत. पर्यटन हा इजिप्तच्या अर्थव्यवस्थेचा प्रमुख आधार आहे. इजिप्तमध्ये सातत्यानं पुरातत्व उत्खनन सुरू असतं. यामधून प्राचीन अवशेष सापडतात. त्याचा फायदा पर्यटन वाढीस होतो. इजिप्तच्या अर्थव्यवस्थेत पर्यटनाचा वाटा १० टक्के आहे. यामुळे २० लाख लोकांना रोजगार मिळतो.
