Cotton and Tur Rate : कापसाच्या दरात अकोटच्या बाजार समितीत चढ उतार सुरु असून तुरीचे दर मात्र वाढत आहेत. तुरीच्या दरात वाढ सुरु असल्यानं शेतकऱ्यांना दिलासा मिळाला आहे.
March 27,अकोला : आज विदर्भातील कापसाची पंढरी समजल्या जाणाऱ्या अकोटच्या कृषी उत्पन्न बाजार समितीत तब्बल ७५ रुपयांनी कापसाच्या दरात घसरण झाली आहे. त्यामुळे कापसाला प्रतिक्विंटल मागे ८ हजार २२५ रूपये इतका भाव आहे. परंतु, कापसाच्या दरात घसरण होत असतानाच अकोल्यात तुरीच्या भावात तेजी आली आहे. कालच्या तुलनेत अकोल्यात आज तुरीचे दर १०० रुपये प्रति क्विंटलने वाढले आहेत. त्यामुळे कृषी उत्पन्न बाजार समित्यांमध्ये तुरीची आवक वाढली आहे, आज तुरीचे भाव ८ हजार ८०० रूपयांपर्यत प्रतिक्विंटल प्रमाणे पोहचले आहे. आगामी काही दिवसात तुरीचे दर ९ हजारांचा टप्पा गाठणार असल्याची शक्यता वर्तवली जात आहे.
पश्चिम विदर्भातील कापूस चांगल्या दर्जाचा असून त्याचा लांब धागा निघतोय. त्यामुळ या कापसाला आंतरराष्ट्रीय बाजारपेठेत चांगली मागणी आहे. गेल्या वर्षी कापसाला १० हजारापासून ते १३ हजार रुपयापर्यंत प्रतिक्विंटल प्रमाणे भाव मिळाला होता. मात्र, यंदा हा कापूस दर अद्यापही ८ हजार पासून ८ हजार ४०० रुपयांवर स्थिरावला आहे. कापसाच्या दरात आणखी वाढ होईल या आशेने अनेक शेतकऱ्यांनी कापूस विक्रीसाठी न आणता कापूस घरातच साठवून ठेवला आहे.
कापसाच्या दरात पुन्हा ७५ रुपयांनी घसरण
गेल्या दोन दिवसात कापसाच्या दरात सुधारणा होऊन वाढ होत असताना पुन्हा कापसाचे दर घसरायला लागले आहेत. अकोटच्या कृषी उत्पन्न बाजार समितीमध्ये शनिवारी कापसाच्या दरात ५० रुपयांनी घसरण झाली. अन् कापसाला प्रतिक्विंटल मागे ७ हजार ७०० ते ८ हजार ३०० रूपयांपर्यत प्रतिक्विंटल प्रमाणे भाव मिळाला होता. परंतु रविवारी बाजार बंद असल्याने आज सोमवारी पुन्हा कापसाच्या दरात ७५ रुपयांनी घसरण झाल्याने कापसाचे दर ७ हजार ६०० ते ८ हजार २२५ रूपयांवर आले आहेत तर आवक २ हजार ७० इतकी क्विंटल झाली आहे.
अकोल्यात १०० तर अकोटच्या बाजारात ४०० रुपयांनी तुरीचे भाव वाढले
सर्वचं बाजारात तुरीची आवक चांगली असून तुरीला चांगला भाव मिळतो आहे. सद्यस्थित कापसाला मिळत असलेल्या भावामुळे शेतकरी चिंताग्रस्त झालाय, त्यात तुरीने शेतकऱ्यांना दिलासा दिला आहे. कारण तुरीला मिळत असलेल्या भावामुळे शेतकऱ्यांसाठी अच्छे दिन आल्याचे दिसून येत आहे.
अकोल्याच्या कृषी उत्पन्न बाजार समितीमध्ये तुरीला शनिवारी ५ हजार ५०० पासून ८ हजार ७०० रूपयांपर्यंत प्रतिक्विंटल प्रमाणे भाव मिळाला होता. तर सरासरी भाव ८ हजार १०० रूपये इतका होता. या दराच्या तुलनेत आज १०० रुपयांनी वाढ झाली आहे. तुरीला आज क्विंटल मागे ५ हजार ५०० पासून ८ हजार ८०० रूपयांपर्यत भाव मिळाला आहे. तर सरासरी भाव ७ हजार ९०० रूपये मिळाला असून २ हजार ४१३ क्विंटल इतकी तूर खरेदी झाली आहे. दूसरीकं अकोटच्या बाजारात शनिवारच्या तुलनेत आज तुरीच्या दरात चारशे रुपयांनी वाढ झाली आहे. तुरीला ७ हजार ७०० पासून ८ हजार ७२५ रूपयांपर्यत प्रतिक्विंटल मागे भाव मिळाला आहे. शनिवारी या बाजारात तुरीला ७ हजार ५०० पासून ८ हजार ३७५ रूपयांपर्यत प्रतिक्विंटल तुरीला भाव होता. त्यामुळ इथे तुरीच्या दरात चारशे रुपयांनी वाढ झाली आहे.
