महाराष्ट्र माहितीचा अधिकार नियम, २०२६ स्थगित;राज्य माहिती आयोगाचे सर्व आयुक्तांना निर्देश
मुंबई-(प्रतिनिधी) – राज्य शासनाने अधिसूचित केलेल्या ‘महाराष्ट्र माहितीचा अधिकार नियम-२०२६’ याची अंमलबजावणी पुढील आदेशापर्यंत स्थगित करण्यात आली आहे. याबाबत महाराष्ट्र राज्य माहिती आयोगाच्या मुख्यालयाने राज्यातील सर्व विभागीय माहिती आयुक्तांना अधिकृत पत्राद्वारे निर्देश दिले आहेत.
राज्य माहिती आयोगाचे सचिव रवीराज फल्ले यांनी जारी केलेल्या पत्रानुसार, माहितीचा अधिकार अधिनियम, २००५ च्या कलम २७(२) अंतर्गत राज्य शासनाने १२ जून २०२६ रोजी राजपत्रात प्रसिद्ध केलेले महाराष्ट्र माहितीचा अधिकार नियम, २०२६ हे मा. मुख्यमंत्री यांच्या निर्देशानुसार स्थगित करण्यात आले आहेत.
राज्य माहिती आयोगाने सर्व विभागीय माहिती आयुक्तांना या निर्णयाची माहिती त्यांच्या महसूल विभागातील सर्व शासकीय कार्यालये तसेच सार्वजनिक प्राधिकरणांना तातडीने कळविण्याचे निर्देश दिले आहेत, जेणेकरून संबंधित कार्यालयांकडून स्थगिती आदेशाची प्रभावी अंमलबजावणी होईल.
या संदर्भातील पत्र राज्य माहिती आयोगाच्या मुख्यालयातून २९ जुलै २०२६ रोजी जारी करण्यात आले असून, त्याची प्रत मुख्यमंत्री कार्यालय तसेच सामान्य प्रशासन विभागालाही पाठविण्यात आली आहे.
माहितीचा अधिकार क्षेत्रातील कार्यकर्ते, अर्जदार आणि सार्वजनिक प्राधिकरणांसाठी हा निर्णय महत्त्वाचा मानला जात असून, पुढील आदेश येईपर्यंत महाराष्ट्र माहितीचा अधिकार नियम, २०२६ लागू राहणार नसल्याचे स्पष्ट झाले आहे.
