संघरत्न गायकवाड “प्रयोगशील युवा शेतकरी व युवा उद्योजक” या राज्यस्तरीय पुरस्काराने सन्मानित
एरंडोल-(शैलेश चौधरी )- येथील माजी उपनगराध्यक्ष शालिग्राम गायकवाड यांचे सुपुत्र व प्रगतीशील तरूण शेतकरी म्हणून सध्या नावारूपास असलेले संघरत्न गायकवाड यांना ह्युमन सर्व्हिस फाउंडेशन व मीडिया एक्झिबिटर्स नाशिकतर्फे ‘कृषिथॉन युवा सन्मान २०१९’ राज्यस्तरीय सन्मान सोहळ्यातील प्रयोगशील युवा उद्योजक पुरस्कार २१ नोव्हेंबर रोजी देण्यात आला,आंतर्राष्ट्रीय पातळीवरील प्रदर्शनाच्या १४ व्या आवृत्तीचे आयोजन करण्यात आले असुन त्यांना यावेळी ‘प्रयोगशील युवा उद्योजक’ म्हणुन पुरस्काराने सन्मानित करण्यात आले. याप्रसंगी आर्कीटेक्ट व नाशिक जिल्हा परीषद अध्यक्षा अमृता पवार यांचेहस्ते संघरत्न यास पुरस्कार देऊन गौरविण्यात आले. गायकवाड हे पदवीधर युवक असुन त्यांनी नोकरीकडे न वळता आपल्या वडिलोपार्जित शेती व्यवसाय करण्याकडे लक्ष घातले. त्यांनी आपली बुद्धी व कौशल्याच्या जोरावर हायटेक शेती केली व त्यात त्यांनी वडीलांच्या सहकार्याने वेगवेगळे नवनवीन प्रयोग केले.आपल्या २० गुंठे शेतात पॉलिहाऊस द्वारे विदेशी भाजीपाला लावला व मोठया प्रमाणावर उत्पन्न देखील घेतले. त्यांनी शेती हा उद्योग म्हणुन केली व त्यात शेती संलग्न व्यवसाय सुध्दा केला. शेतात बंदिस्त शेळी पालन हा व्यवसाय देखील केला. १००शेळ्या यात त्यांनी सद्यस्थितीला पाळल्या आहेत. हा उपक्रम बघण्यासाठी अनेक तरुण तथा शेतकरी त्यांच्या प्रतिष्ठान वजा उपक्रमास भेट देत असतात. याच बरोबर त्यांनी आपल्या शेतात उत्कृष्ट कुक्कूट पालन सुध्दा केले आहे, २००० पक्षांपासून सुरू केलेला हा व्यवसाय आता २५००० पक्षांवर येऊन ठेपला आहे. यात संघरत्न यांनी संपूर्ण जिल्ह्यात आपले नाव केले आहे. त्यांनी या व्यवसायात आपल्या सोबत अनेक युवा शेतकरी वर्गास मार्गदर्शन करुन हा व्यवसाय करण्यास प्रोत्साहित केले आहे. त्यांच्या या प्रेरणादायी वाटचालीचे सर्व स्तरांतून कौतूक होत आहे.यावेळी मिडीया गृपचे डायरेक्टर तथा कृषीथॉन चे आयोजक साहील संजय न्याहारकर, अश्वीनी संजय न्याहारकर,संजय न्याहारकर सि. ई. ओ व आयोजक तसेच आयोजकांचे प्रेरणास्थान असलेले विमल व्ही. न्याहारकर व नितीन मराठे उपस्थित होते.
